ဇွန်လ ၁၃ ရက်။
Facebook ၏ မိခင်ကုမ္ပဏီဖြစ်သော Meta သည် Mytel ပိုင်ဆိုင်တဲ့ကမ္ဘာ့ဖလားဘောလုံးပြိုင်ပွဲ ထုတ်လွှင့်ပြသမှုကြော်ငြာ TV360 Facebook စာမျက်နှာကို သောကြာနေ့တွင် ဖယ်ရှားလိုက်ကြောင်း Justice For Myanmar ကထုတ်ပြန်ပါတယ်။
အဆိုပါ စာမျက်နှာကို စစ်တပ်ပိုင်ကုမ္ပဏီဖြစ်သော Mytel က ကမ္ဘာ့ဖလားဘောလုံးပြိုင်ပွဲ ထုတ်လွှင့်ပြသမှုကို ကြော်ငြာရန် အသုံးပြုနေခဲ့ခြင်းဖြစ်ကြောင်း၊ဒဏ်ခတ်ပိတ်ဆို့ခံထားရသည့် စစ်တပ်ပိုင်စီးပွားရေးလုပ်ငန်းစုကြီးဖြစ်သည့် မြန်မာ့စီးပွားရေးကော်ပိုရေးရှင်း (MEC) က ပူးတွဲပိုင်ဆိုင်ထားသည့် Mytel သည် ကမ္ဘာ့ဖလားပြိုင်ပွဲ၏ မြန်မာနိုင်ငံအတွက် တစ်ဦးတည်းမူပိုင် ထုတ်လွှင့်ခွင့်ကို ကမ္ဘာ့ဘောလုံးအဖွဲ့ချုပ် (FIFA) ထံမှ ရရှိခဲ့ခြင်းဖြစ်ပြီး၊ ယင်းသည် ဖီဖာ၏ လူ့အခွင့်အရေးအပေါ် ဆိုးဆိုးရွားရွား လျစ်လျူရှုသည့် လုပ်ရပ်လည်းဖြစ်ကြောင်း Justice For Myanmar ကဆိုပါတယ်။
“မြန်မာစစ်တပ်နှင့် ၎င်းတို့၏ စီးပွားရေးလုပ်ငန်းများကို Meta က ၎င်း၏ ပလက်ဖောင်းများပေါ်တွင် အသုံးပြုခွင့် တားမြစ်ပိတ်ပင်ထားသည့်မူဝါဒ” အရ Justice For Myanmar က ယင်း TV360 စာမျက်နှာကို သောကြာနေ့အစောပိုင်းတွင် Facebook ထံသို့ အသိပေးတိုင်ကြားခဲ့ခြင်းဖြစ်ပါတယ်။
အမေရိကန်၊ ကနေဒါနှင့် မက္ကဆီကို ၃ နိုင်ငံက ပူးတွဲအိမ်ရှင်အဖြစ် လက်ခံကျင်းပမယ့် ၂၀၂၆ ကမ္ဘာ့ဖလား (FIFA World Cup 2026) ပြိုင်ပွဲကြီးကို ဇွန်လ ၁၁ ရက်နေ့မှာစတင်ခဲ့ကာ လာမည့် ဇူလိုင်လ ၁၉ ရက်နေ့အထိ ကျင်းပသွားမှာဖြစ်ပါတယ်။