ဇွန်လ ၁၀ ရက်။
အိန္ဒိယနိုင်ငံ ပြည်နယ်အချင်းချင်းနှင့် နယ်စပ်ဖြတ်ကျော် မူးယစ်ဆေးဝါး မှောင်ခိုကူးမှုကွန်ရက်နဲ့ ဆက်နွှယ်နေတဲ့ ငွေကြေးခဝါချမှု ဖြစ်စဉ်ကို စုံစမ်းစစ်ဆေးခဲ့ရာမှာ ပြီးခဲ့တဲ့ ၂၀၂၅ ခုနှစ် ဩဂုတ်လကတည်းကနေ လက်ရှိအချိန်အထိ (၁) နှစ်နီးပါး ကာလအတွင်း ရာဇဝတ်မှုကနေ ရရှိထားတဲ့ အိန္ဒိယရူပီးငွေ ကုဋေ ၁၄၂ ကျော် (အမေရိကန်ဒေါ်လာ ၁၇ သန်းခန့်) တန်ဖိုးရှိတဲ့ တရားမဝင်ငွေကြေးနဲ့ ပိုင်ဆိုင်မှုတွေကို စုံစမ်းဖော်ထုတ်နိုင်ခဲ့ပြီလို့ အိန္ဒိယအမှုစုံစမ်းစစ်ဆေးရေးညွှန်ကြားမှုဦးစီးဌာန (ED) ရဲ့ အရာရှိတွေက ပြောပါတယ်။
အဆိုပါ မူးယစ်မှောင်ခိုကွန်ရက်ကို ဖြိုခွင်းနိုင်ဖို့အတွက် ED ၏ Aizawl) ရုံးခွဲက အဖွဲ့စုံဟာ ဇွန်လ ၉ ရက် အစောပိုင်းအချိန်ကစတင်ကာ မီဇိုရမ်-မြန်မာနယ်စပ်ဒေသ၊ ထရီပူရ-ဘင်္ဂလားဒေ့ရှ်နယ်စပ်နဲ့ အနောက်ဘင်္ဂလား (West Bengal) ပြည်နယ်တစ်ဝန်းရှိ သံသယရှိဖွယ်နေရာ ၄ ခုမှာ စီးနင်းရှာဖွေမှုတွေကို တစ်ပြိုင်နက်တည်း ဆက်လက်လုပ်ဆောင်ခဲ့ကြတာ ဖြစ်ပါတယ်။
ယခုစီးနင်းမှုကို ၂၀၀၂ ခုနှစ် ငွေကြေးခဝါချမှု တားဆီးနှိမ်နင်းရေးအက်ဥပဒေ (PMLA) ပုဒ်မ ၁၇ အရ လုပ်ဆောင်ခဲ့တာဖြစ်ပြီး၊ မူးယစ်ဆေးဝါး မှောင်ခိုကူးမှုကနေ ရရှိလာတဲ့ ငွေကြေးတွေကို ခဝါချမှုမှာ ပါဝင်ပက်သက်နေတယ်လို့ သံသယရှိရသူတွေရဲ့ နေအိမ်နဲ့ လုပ်ငန်းပတ်ဝန်းကျင်တွေကို ပစ်မှတ်ထား ရှာဖွေခဲ့တာ ဖြစ်ပါတယ်။
ဒီအကြီးစား ငွေကြေးခဝါချမှုအမှုဟာ ပြီးခဲ့တဲ့ ၂၀၂၅ ခုနှစ်၊ ဩဂုတ်လ ၂၁ ရက်နေ့က ထရီပူရပြည်နယ်မှာ မက်သဖက်တမင်း (စိတ်ကြွဆေးပြား) ၄၉ ဒသမ ၁၀၁ ကီလိုဂရမ်နဲ့ ဘိန်းဖြူ ၄၀ ဂရမ် ဖမ်းဆီးရမိခဲ့တဲ့ ဖြစ်စဉ်အပေါ် အိန္ဒိယမူးယစ်ဆေးဝါးထိန်းချုပ်ရေးဗျူရို (NCB) ရဲ့ စုံစမ်းစစ်ဆေးမှုကနေ မြစ်ဖျားခံလာတာ ဖြစ်ပါတယ်။
အဆိုပါ ၂၀၂၅ ခုနှစ် ဩဂုတ်လ ဖမ်းဆီးရမိမှု ဖြစ်စဉ်ကနေစတင်ပြီး လက်ရှိ ဇွန်လ ၉ ရက်နေ့ စီးနင်းမှုတွေအထိ (၁) နှစ်နီးပါးကြာ စုံစမ်းစစ်ဆေးမှု သက်တမ်းတစ်လျှောက်လုံးမှာ ဘဏ်အကောင့်ပေါင်းစုံနဲ့ ကုမ္ပဏီအတု (Shell Entities) တွေကို အဆင့်ဆင့် ကွင်းဆက်လိုက် ခြေရာခံလာခဲ့ရာကနေ စုစုပေါင်း ရူပီး ၁၄၂ ကုဋေကျော်အထိ ရှိနေပြီဆိုတာကို စုစည်းဖော်ထုတ်နိုင်ခဲ့တာ ဖြစ်တယ်လို့ အရာရှိတွေက ဆိုပါတယ်။
စုံစမ်းစစ်ဆေးမှုရဲ့ ကနဦးတွေ့ရှိချက်တွေအရ ၎င်းတို့အသုံးပြုသည့် မူးယစ်ဆေးဝါး ဖြန့်ကြက်ရာ လမ်းကြောင်းသည် မြန်မာနိုင်ငံအတွင်းမှ ထွက်ရှိလာသော မက်သဖက်တမင်း (စိတ်ကြွဆေး) များကို အိန္ဒိယ-မြန်မာနယ်စပ်ရှိ မီဇိုရမ်ပြည်နယ်၏ ချန်ဖိုင်း (Champhai) နှင့် ဇိုခေါဝ်ထရ် (Zokhawthar) ဟူသော နယ်စပ်ဂိတ် နှစ်နေရာမှတစ်ဆင့် အိန္ဒိယနိုင်ငံအတွင်းသို့ အဓိက သယ်ယူသွင်းပိုးခဲ့ကြခြင်း ဖြစ်ကြောင်း သိရပါတယ်။
ထိုသို့ ဝင်ရောက်လာပြီးနောက် မီဇိုရမ်လမ်းကြောင်းမှတစ်ဆင့် အိမ်နီးချင်း ထရီပူရ (Tripura) ပြည်နယ်ရှိ လက်ခံမည့်သူများထံ ဖြန့်ကြက်ပို့ဆောင်ပြီး၊ ၎င်းမှတစ်ဆင့် ဘင်္ဂလားဒေ့ရှ်နိုင်ငံ နယ်စပ်နှင့် အနောက်ဘင်္ဂလား (West Bengal) ပြည်နယ်ရှိ ပြည်တွင်းဈေးကွက်များအထိ ကွင်းဆက်စနစ်တကျ ဖြန့်ချိနေသည့် နိုင်ငံဖြတ်ကျော် မူးယစ်ဆေးဝါးမှောင်ခိုဂိုဏ်းကြီးတစ်ခု ဖြစ်နေကြောင်း အထောက်အထားများက ထောက်ပြနေတယ်လို့ India Today သတင်းဌာနမှာဖော်ပြပါတယ်။
အာဏာပိုင်တွေရဲ့ အဆိုအရ ထရီပူရပြည်နယ်မှာ စီးနင်းရှာဖွေခဲ့တဲ့ နေရာတွေဟာ ဘင်္ဂလားဒေ့ရှ်နယ်စပ်ကနေ မီတာ ၂၀၀ ခန့်သာ ကွာဝေးပြီး၊ မီဇိုရမ်ပြည်နယ်အတွင်း ရှာဖွေခဲ့တဲ့ နေရာတွေကတော့ မြန်မာနယ်စပ်ကနေ မီတာ ၅၀၀ ခန့်အကွာမှာ တည်ရှိနေတာ ဖြစ်ပါတယ်။
ယခုလို စီးနင်းရှာဖွေမှုတွေ ဆက်တိုက်ပြုလုပ်ရခြင်းဟာ ဘဏ္ဍာရေးဆိုင်ရာ အရောင်းအဝယ်ပြုလုပ်မှုတွေနဲ့ ပတ်သက်တဲ့ သက်သေအထောက်အထားတွေကို ပိုမိုစုဆောင်းဖို့၊ အဆိုပါ မူးယစ်မှောင်ခိုဂိုဏ်းကနေ အကျိုးအမြတ် ခံစားနေကြသူတွေကို ထပ်မံဖော်ထုတ်ဖို့နဲ့ နယ်စပ်ဖြတ်ကျော် မူးယစ်ဆေးဝါးကုန်သွယ်မှုကနေ ထွက်ပေါ်လာတဲ့ တရားမဝင် ရန်ပုံငွေ စီးဆင်းမှုတွေကို အမြစ်ပြတ် ခြေရာခံဖို့ ရည်ရွယ်တာ ဖြစ်ပါတယ်။
ဒီလုပ်ငန်းစဉ်ဟာ မြန်မာနိုင်ငံကနေ ထွက်ရှိပြီး စနစ်တကျ ဖွဲ့စည်းထားတဲ့ မှောင်ခိုကွန်ရက်တွေကတစ်ဆင့် အိန္ဒိယပြည်တွင်းဈေးကွက်ထဲကို ဝင်ရောက်လာတဲ့ ဓာတုမူးယစ်ဆေးဝါးတွေအတွက် အိန္ဒိယရဲ့ အရှေ့မြောက်ဘက် နယ်စပ်ဒေသတွေကို ကြားခံဖြတ်သန်းရာ လမ်းကြောင်းတွေအဖြစ် အသုံးပြုနေကြတဲ့အပေါ် အရေးယူဆောင်ရွက်ရေးအေဂျင်စီတွေအကြား စိုးရိမ်ပူပန်မှုတွေ ပိုမိုကြီးထွားလာနေတာကို မီးမောင်းထိုးပြနေပါတယ်။ လက်ရှိမှာတော့ စုံစမ်းစစ်ဆေးမှုတွေကို ဆက်လက်လုပ်ဆောင်နေဆဲဖြစ်ပြီး၊ စီးနင်းရှာဖွေမှုတွေအတွင်း ရရှိလာတဲ့ သက်သေအထောက်အထားတွေအပေါ် အခြေခံပြီး နောက်ထပ် အရေးယူဆောင်ရွက်မှုတွေ ထွက်ပေါ်လာဖို့ ရှိနေတယ်လို့ သိရပါတယ်။