ချင်းပြည်နယ်၊ မတူပီမြို့နယ်အတွင်း ဒီကနေ့ နိုဝင်ဘာလ ၁၇ ရက်နေ့ မနက်ပိုင်း (၇)နာရီ ၊ ၃၄ မိနစ် မိနစ်လောက်မှာ အင်အား ရစ်ခ်တာစကေး ၄.၄ အဆင့်ဖြင့် အင်အားအနည်းငယ်ရှိ မြေငလျင်လှုပ်ခတ်ခဲ့ပေမယ့် ဒေသခံတွေ အများစုကတော့ လှုပ်ခတ်တာမသိလိုက်ကြဘူးလို့ပြောပါတယ်။
မတူပီမြို့အနီး၊ မြေအောက်အနက် ၂၇ ကီလိုမီတာကို ဗဟိုပြုပြီး ရစ်ခ်တာစကေး ၄.၄ အဆင့်ဖြင့် အင်အားအနည်းငယ်ရှိ မြေငလျင်လှုပ်ခတ်ခဲ့တာလို့ အမျိုးသားညီညွတ်ရေးအစိုးရ (NUG )၊ လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာ စီမံခန့်ခွဲရေဝန်ကြီးဌာနက ဒီကနေ့ နိုဝင်ဘာလ ၁၇ ရက်နေ့မှာ ထုတ်ပြန်ပါတယ်။
မတူပီမြို့နယ်ကဒေသခံတစ်ဦးက “ ကျနော်တို့က သတင်းထုတ်ပြန်မှ ငလျင်လှုပ်တယ်ဆိုတာ သိရတာ ငလျှင်လှုပ်တာ မခံစားမိလိုက်ဘူး ၊ မသိလိုက်ဘူး” လို့ပြောပါတယ်။
ဟားခါးမြေငလျင်စခန်းမှ တောင်ဘက် (၇၇) မိုင်ခန့် ကွာဝေးတဲ့ မတူပီမြို့ရဲ့ တောင်အနောက်တောင်ဘက် ၅ မိုင်ခန့်အကွာ မြောက်လတ္တီတွဒ် (၂၁.၅၃) ဒီဂရီ၊ အရှေ့လောင်ဂျီတွဒ် (၉၃.၄၂) ဒီဂရီ၊ အနက် (၁၀) ကီလိုမီတာကို ဗဟိုပြုပြီး အင်အား ရစ်ခ်တာစကေး (၃.၉) အဆင့်ရှိ မြေငလျင်လှုပ်ခတ်သွားတယ်လို့လည်း စစ်ကော်မရှင်လက်အောက်ခံ မိုးလေဝသနှင့် ဇလဗေဒညွှန်ကြားရေးမှူးဦးစီးဌာနကလည်း ဒီကနေ့ မနက်မှာ ထုတ်ပြန်ထားပါတယ်။