ဩဂုတ်လ ၂၈ ရက်။
အိန္ဒိယနိုင်ငံ၊ မီဇိုရမ်ပြည်နယ်အတွင်း မူးယစ်ဆေး၀ါးသုံးစွဲမှုကြောင့် ၂၀၂၀ ခုနှစ်ကနေ ၂၀၂၅ ဩဂုတ်လ (၈) ရက်နေ့အထိ သေဆုံးသူ ၃၅၁ ဦးရှိပြီး အမျိုးသမီး ၄၆ ဦးပါ၀င်တယ်လို့ ဗုဒ္ဓဟူးနေ့မှာကျင်းပပြု လုပ်တဲ့ ပြည်နယ်လွှတ်တော်အစည်းအေ၀းမှာ ပြည်နယ်အရက်နှင့် မူးယစ်ဆေးဝါးဌာနဝန်ကြီး Lainghinghlova Hmar ကပြောကြားခဲ့တယ်လို့ ဩဂုတ်လ (၂၇) ရက်နေ့မှာ India Today သတင်းဌာနမှာဖော်ပြပါတယ်။
လွှတ်တော်အစည်းအေ၀းမှာ Mizo National Front ပါတီဝင် လွှတ်တော်အမတ် K Laldawngliana ရဲ့ မေးမြန်းချက်ကို ဝန်ကြီး Hmar က ပြန်လည်ဖြေကြားခဲ့တာဖြစ်ပြီး ၂၀၂၀ ပြည့်နှစ်မှ ၂၀၂၅ ခုနှစ်၊ ဩဂုတ်လ ၈ ရက်နေ့အထိ သေဆုံးသူ စုစုပေါင်း ၃၅၁ ဦးရှိတဲ့အကြောင်း၊ အဲဒီအထဲက ၇၈ ဦးဟာ ဟီးရိုးအင်း သုံးစွဲမှုကြောင့် သေဆုံးခဲ့ပြီး၊ ၂၇၃ ဦး ကတော့ မူးယစ်ဆေးဝါးမျိုးစုံ သုံးစွဲမှုကြောင့် သေဆုံးခဲ့တယ်လို့ ဆိုပါတယ်။
သေဆုံးသူတွေရဲ့ အသက်အပိုင်းအခြားကတော့ ၁၉ နှစ်ကနေ ၅၇ နှစ်အထိ ဖြစ်ပြီး၊ သေဆုံးမှုအများဆုံးနှစ်ကတော့ ၂၀၂၃ ခုနှစ် ဖြစ်ပြီး ၇၆ ဦး အထိ သေဆုံးခဲ့ပါတယ်။ ဒီနှစ်၊ ဇန်နဝါရီလကနေ ဩဂုတ်လ ၈ ရက်နေ့အထိဆိုရင် အမျိုးသမီး ၇ ဦး အပါအဝင် ၅၁ ဦး သေဆုံးခဲ့ပါတယ်။
မီဇိုရမ်ပြည်နယ်မှာရှိတဲ့ ခရိုင် ၁၁ ခုထဲက Aizawl ခရိုင်မှာ သေဆုံးမှုအများဆုံးဖြစ်ပြီး ၂၇၄ ဦး ရှိကာ၊ Lunglei ခရိုင်မှာ ၆၉ ဦး၊ Champhai ခရိုင်မှာ ၅၈ ဦးနဲ့ Hnahthial ခရိုင်မှာတော့ တစ်ဦး သေဆုံးခဲ့ပါတယ်။
ယခုကာလအတွင်း အရက်နှင့် မူးယစ်ဆေးဝါးဌာနက ဟီးရိုးအင်း ၂၁၂.၉၈၇ ကီလိုဂရမ်၊ မက်သာဖက်တမင်း ၅၆၈.၉၉၁ ကီလိုဂရမ်၊ ဆေးခြောက် ၁,၅၆၆.၆၆၂ ကီလိုဂရမ်တို့ကို သိမ်းဆည်းရမိခဲ့ပြီး၊ အဲဒီတန်ဖိုးဟာ ရူပီး ၁၅၂.၄၃ ကုဋေခန့် တန်ဖိုးရှိတဲ့အပြင် Narcotic Drugs and Psychotropic Substances Act အရ လူပေါင်း ၄,၄၀၀ ကိုလည်း အရေးယူဖမ်းဆီးခဲ့ပါတယ်။
ပြည်နယ်ပြည်ထဲရေးဝန်ကြီး K Sapdanga က မူးယစ်ဆေးဝါးသုံးစွဲမှုနဲ့ မှောင်ခိုကူးမှုကို ထိန်းချုပ်နိုင်ဖို့အတွက် ရဲတပ်ဖွဲ့၊ မူးယစ်ဆေးဝါးအရာရှိတွေနဲ့ Young Mizo Association (YMA) တို့ ပူးပေါင်းပြီး တားဆီးမှုတွေ လုပ်ဆောင်သွားမယ်လို့ ပြောပါတယ်။
မီဇိုရမ်ဟာ မြန်မာနိုင်ငံနဲ့ ၅၁၀ ကီလိုမီတာ ရှည်လျားတဲ့ နယ်စပ်ကို ဖြတ်ကျော်ရလွယ်ကူပြီး၊ မြန်မာ၊ ထိုင်း၊ လာအို သုံးနိုင်ငံနယ်စပ်ဒေသက နာမည်ဆိုးနဲ့ ကျော်ကြားတဲ့ “ရွှေတြိဂံနယ်မြေ” နဲ့ နီးကပ်နေတာကြောင့် မူးယစ်ဆေးဝါးခြိမ်းခြောက်မှုကို အမြဲတမ်း ရင်ဆိုင်နေရတယ်လို့ ပြည်နယ်ပြည်ထဲရေး၀န်ကြီးကပြောပါတယ်။