ဖေဖော်ဝါရီလ ၁၉ ရက်။
ချင်းပြည်နယ်၊ ဟားခါးမြို့နယ်က ဇိုခွာ (Zokhua)၊ချင်ခွာ (Cin Khua )နဲ့ဖလမ်းမြို့နယ် Lumbang ရွာ ကို စစ်ကော်မရှင်က ဒီကနေ့ ဖေဖော်ဝါရီလ ၁၉ ရက်နေ့ မနက်ပိုင်း ၁ နာရီဝန်းကျင်လောက်မှာ အကြောင်းမဲ့ လေကြောင်းကနေ ဗုံးကြဲတိုက်ခိုက်ခဲ့လို့ အရပ်သားနေအိမ်အမြောက်အများထိခိုက်ပျက်စီးခဲ့သလိုအရပ်သားပြည်သူ တချို့ ထိခိုက်ဒဏ်ရာရခဲ့တယ်လို့ သိရပါတယ်။
ဒေသခံတွေနဲ့ နီးစပ်သူတစ်ဦးက “Zokhua ရွာကို လေကြောင်းကနေ အရင်ဗုံးကြဲတိုက်ခိုက်ခဲ့တယ် အဲဒီမှာ နေအိမ် ၃ လုံးလောက် ပျက်စီးခဲ့တယ် နောက်ပြီး Cinkhua ရဲ့ အနီးနားဝန်းကျင်ကိုလည်း လေကြောင်းကနေ ဗုံးကြဲတိုက်ခိုက်ခဲ့တယ် အဲဒီမှာ နေအိမ်အမြောက်အများ ပျက်စီးခဲ့သလို ဒေသခံ ၃ ဦး ထိခိုက်ဒဏ် အပြင်းအထန် ရခဲ့တယ်လို့ သတင်းကြားတယ်” လို့ ပြောပါတယ်။
စစ်ကော်မရှင်တပ်ဖွဲ့ရဲ့ အကြောင်းမဲ့ လေကြောင်းတိုက်ခိုက်မှုကြောင့် ထိခိုက်ဒဏ်ရာရခဲ့သူ ၃ ဦးထဲမှာ ၁ ဦးဟာ အသက်အန္တရာယ်စိုးရိမ်ရတဲ့ အခြေအနေမှာရှိပြီး လက်ရှိ ဟားခါးမြို့ဆေးရုံမှာ ဆေးကုသမှုခံယူနေတယ်လို့လည်း သိရပါတယ်။
ဖလမ်းမြို့အရှေ့ဘက်ခြမ်းမှာ တည်ရှိတဲ့ ဖလမ်းမြို့နယ်ထဲက Lumbang ရွာကိုလည်း ဒီကနေ့ မနက်ပိုင်း ၁ နာရီခွဲခန့်မှာ Y12 နဲ့ လေကြောင်းကနေ ဗုံးကြဲတိုက်ခိုက်ခဲ့လို့ နေအိမ်ထိခိုက်တာတွေ ရှိသလို ဒေသခံအမျိုးသမီးတစ်ဦး (မစိုးရိမ်ရ) ထိခိုက်ဒဏ်ရာ ရရှိခဲ့တယ်လို့လည်း သိရပါတယ်။
ဖေဖော်ဝါရီလ ၁၀ ရက်နေ့ကလည်း ထန်တလန်မြို့နယ်၊ တလန်ခွါကျေးရွာကို တိုက်ပွဲတစ်စုံတရာ ဖြစ်ပွားခြင်းမရှိ အကြောင်းမဲ့ လေကြောင်းကနေ ဗုံးကြဲတိုက်ခိုက်ခဲ့လို့ သက်ကြီးရွယ်အို အမျိုးသားအပါအဝင် အရပ်သားပြည်သူ ၆ ဦး သေဆုံးခဲ့ပြီး လူအမြောက်အများ ထိခိုက်ဒဏ်ရာရခဲ့တာတွေ ရှိခဲ့ပါတယ်။