ဇွန်လ ၁၃ ရက်။
အိန္ဒိယနိုင်ငံ၊ မီဇိုရမ်ပြည်နယ်က အတိုက်အခံ ကွန်ဂရက်ပါတီဟာ ဇွန်လ ၁၂ ရက် မှာ လက်ရှိအာဏာရ Zoram People’s Movement (ZPM) အစိုးရကို ပွင့်လင်းမြင်သာတဲ့ အုပ်ချုပ်ရေး၊ တာဝန်ခံမှုရှိမှုနဲ့ စီမံခန့်ခွဲမှုဆိုင်ရာ ပြုပြင်ပြောင်းလဲရေး ကတိကဝတ်တွေကို ဖြည့်ဆည်းပေးဖို့ ပျက်ကွက်နေတယ်ဆိုပြီး စွပ်စွဲလိုက်ပါတယ်။
အိုင်ဇောလ်မြို့ရှိ Congress Bhavan မှာ ပြုလုပ်ခဲ့တဲ့ နိုင်ငံရေးဆိုင်ရာ အစည်းအဝေးတစ်ခုမှာ ပြည်နယ်ကွန်ဂရက်ပါတီ ဒုတိယဥက္ကဋ္ဌ Lalnunmawia Chuaungo က ZPM အစိုးရဟာ သန့်ရှင်းတဲ့ အုပ်ချုပ်ရေးစနစ်ကို အခြေခံပြီး အာဏာရလာခဲ့တာ ဖြစ်ပေမဲ့လည်း ယခင် မီဇိုအမျိုးသားတပ်ဦး (MNF) အစိုးရရဲ့ လုပ်ထုံးလုပ်နည်း အတော်များများကို ဆက်လက် ကျင့်သုံးနေတယ်လို့ စွပ်စွဲပြောဆိုလိုက်တာဖြစ်ပါတယ်။
“ZPM ဟာ အဲဒီကတိကဝတ်တွေကို အကောင်အထည်ဖော်ဖို့ ပျက်ကွက်ခဲ့ပြီး၊ သူတို့ကိုယ်တိုင် ယခင်က ဝေဖန်ပြစ်တင်ခဲ့တဲ့ MNF အစိုးရဟောင်းရဲ့ လုပ်ထုံးလုပ်နည်းတွေကိုပဲ ဆက်ပြီး လုပ်ဆောင်နေပါတယ်” လို့ သူက ပြောဆိုခဲ့ပါတယ်။
ကွန်ဂရက်ပါတီ ခေါင်းဆောင်ရဲ့ စွပ်စွဲချက်အရ လက်ရှိ အုပ်ချုပ်ရေးအောက်မှာ ကန့်သတ်ချက်တွေနဲ့ တင်ဒါခေါ်ယူတာတွေ၊ တင်ဒါတွေ မထုတ်ပြန်ခင်ကတည်းက စာချုပ်ချုပ်ဆိုမယ့်သူတွေကို ကြိုတင်သတ်မှတ် ဆုံးဖြတ်ထားတဲ့ အလေ့အထတွေဟာ ဆက်ရှိနေတုန်းပဲ ဖြစ်တယ်လို့ ဆိုပါတယ်။
ဒါ့အပြင် ဌာနဆိုင်ရာ လုပ်ငန်းတွေကို လုပ်ငန်းကြီးကြပ်ရေးမှူးတွေကတစ်ဆင့် မိမိတို့မျက်နှာသာပေးလိုတဲ့ ပုဂ္ဂိုလ်တွေကို ပေးအပ်တာမျိုးတွေဟာလည်း ပိုမိုများပြား လာနေတယ်လို့ သူက အခိုင်အမာ ပြောဆိုခဲ့ပါတယ်။
Chuaungo က အစိုးရဟာ Mizoram Lokayukta အက်ဥပဒေနဲ့ သက်ဆိုင်တဲ့ ပြဋ္ဌာန်းချက်တွေကို ပြင်ဆင်ပြီး အဂတိလိုက်စားမှု တိုက်ဖျက်ရေး ယန္တရားတွေကို အားနည်းသွားအောင် လုပ်ဆောင်ဖို့ ကြိုးပမ်းခဲ့တယ်လို့လည်း ထပ်မံစွပ်စွဲလိုက်ပါတယ်။
ဒါ့အပြင် ကန့်သတ်တင်ဒါတွေနဲ့ အဓိက စာချုပ်ကြီးတွေကို အတည်ပြုပေးနိုင်ဖို့အတွက် ဝန်ကြီးချုပ်ရုံး (Chief Minister’s Office) ထဲမှာတင် အာဏာတွေ စုပြုံထားရှိမှုကိုလည်း သူက ဝေဖန်ပြစ်တင်လိုက်ပါတယ်။
ပြည်နယ်ရဲ့ ဘဏ္ဍာရေး အခြေအနေနဲ့ ပတ်သက်ပြီး ပြောကြားရာမှာတော့ မီဇိုရမ်ပြည်နယ်ဟာ ဗဟိုအစိုးရရဲ့ ရန်ပုံငွေအပေါ်မှာပဲ အလွန်အမင်း မှီခိုနေရဆဲ ဖြစ်တယ်လို့ သူက ဆိုပါတယ်။
၂၀၁၆-၁၇ ဘဏ္ဍာနှစ်မှာ ပြည်နယ်ရဲ့ ခန့်မှန်းခြေ ဘတ်ဂျက်ဟာ ရူပီးကုဋေ ၈,၀၃၈ ဒသမ ၃၉ သာ ရှိခဲ့ရာကနေ၊ အခု ၂၀၂၆-၂၇ ဘဏ္ဍာနှစ်အတွက် ပြည်နယ်ရဲ့ ခန့်မှန်းခြေ ဘတ်ဂျက်ဟာ ရူပီးကုဋေ ၁၇,၄၉”၆ ဒသမ ၉၁ အထိ ရှိလာခဲ့ပေမဲ့ ပြည်နယ်ရဲ့ ကိုယ်ပိုင်ဝင်ငွေ ရှာဖွေပံ့ပိုးနိုင်မှုကတော့ နှိုင်းယှဉ်ချက်အရ အလွန်နည်းပါးနေသေးတယ်လို့ သူက ထောက်ပြခဲ့ပါတယ်။
သူ့ရဲ့ ပြောပြချက်အရ လျာထားတဲ့ ဘတ်ဂျက်ရဲ့ ၁၆ ရာခိုင်နှုန်းအောက်ကသာ ပြည်နယ်ရဲ့ ကိုယ်ပိုင်အခွန်ဝင်ငွေနဲ့ ပြည်တွင်းအရင်းအမြစ်တွေကနေ ရရှိမှာဖြစ်ပြီး၊ ရန်ပုံငွေ အများစုကိုတော့ ဗဟိုအစိုးရရဲ့ အခွန်ခွဲဝေမှု၊ ထောက်ပံ့ကြေးတွေနဲ့ ဗဟိုက ကူညီပံ့ပိုးပေးတဲ့ စီမံကိန်းတွေဆီကနေ ရရှိတာ ဖြစ်တယ်လို့ ဆိုပါတယ်။