ဧပြီလ ၂၉ ရက်။
အိန္ဒိယနိုင်ငံ၊ မီဇိုရမ်ပြည်နယ်ရဲ့ ၁၂ တန်း ဘုတ်အဖွဲ့စာမေးပွဲရလဒ်တွေကို ဒီကနေ့ ဧပြီလ ၂၉ ရက်နေ့မှာ ထုတ်ပြန်လိုက်ရာမှာ ၁၀,၇၃၄ ဦး အောင်မြင်ပြီး၊ ၁,၃၉၄ ဦး ရှုံးနိမ့်ကာ တစ်ပြည်နယ်လုံး အတိုင်းအတာနဲ့ ၈၇.၆၇ ရာခိုင်နှုန်း အောင်မြင်ခဲ့တယ်လို့ သိရပါတယ်။
မီဇိုရမ်ပြည်နယ် ကျောင်းပညာရေးဘုတ်အဖွဲ့ရဲ့ ထုတ်ပြန်ချက်အရ ဒီနှစ်မှာ ယောက်ျားလေးတွေရဲ့ အောင်ချက်က မိန်းကလေးတွေထက် နည်းနည်းလေး ပိုသာနေတာကို တွေ့ရပါတယ်။ ယောက်ျားလေးတွေက ၈၇.၇ ရာခိုင်နှုန်း အောင်မြင်ခဲ့ပြီး မိန်းကလေးတွေကတော့ ၈၇.၆၆ ရာခိုင်နှုန်း အောင်မြင်ခဲ့တာပါ။
ဒီနှစ် ဖေဖော်ဝါရီလနဲ့ မတ်လအတွင်း ကျင်းပခဲ့တဲ့ စာမေးပွဲမှာ ကျောင်းသား၊ ကျောင်းသူ စုစုပေါင်း ၁၂,၂၄၃ ဦး ဝင်ရောက်ဖြေဆိုခဲ့ကြပါတယ်။ အဲဒီအထဲက ၁၀,၇၃၄ ဦး အောင်မြင်ခဲ့ပြီး၊ ၁,၃၉၄ ဦး ရှုံးနိမ့်ခဲ့သလို၊ ၁၁၅ ဦးကတော့ ဘာသာရပ်ပြန်လည်ဖြေဆိုရမယ့် (Compartmental) အုပ်စုထဲမှာ ပါဝင်နေပါတယ်။
ဘာသာရပ်ခွဲအလိုက် ကြည့်မယ်ဆိုရင် ဝါဏိဇ္ဇဗေဒ (Commerce) အောင်ချက်က ၉၀.၅၁ ရာခိုင်နှုန်းနဲ့ အမြင့်ဆုံးဖြစ်နေပြီး ဖြေဆိုသူ ၇၅၉ ဦး ရှိခဲ့ပါတယ်။ သိပ္ပံဘာသာတွဲ (Science) မှာတော့ ဖြေဆိုသူ ၂,၇၇၀ ဦးအနက် ၈၉.၂၄ ရာခိုင်နှုန်း အောင်မြင်ခဲ့သလို၊ ဖြေဆိုသူ အများဆုံးဖြစ်တဲ့ ဝိဇ္ဇာဘာသာတွဲ (Arts) မှာတော့ ၈,၇၁၄ ဦး ဝင်ရောက်ဖြေဆိုခဲ့ပြီး ၈၆.၉၃ ရာခိုင်နှုန်း အောင်မြင်ခဲ့တာ ဖြစ်ပါတယ်။
ကျောင်းအမျိုးအစားအလိုက် အောင်ချက်တွေကို စိစစ်ကြည့်ရာမှာတော့ အစိုးရဆီက ပုံမှန်ထောက်ပံ့ကြေးရတဲ့ (Deficit Schools) တွေက ၉၃.၈၀ ရာခိုင်နှုန်းနဲ့ အောင်ချက်အကောင်းဆုံး ဖြစ်ခဲ့ပါတယ်။ ပုဂ္ဂလိကကျောင်းတွေက ၉၁.၅၅ ရာခိုင်နှုန်းနဲ့ ဒုတိယလိုက်နေပြီး၊ အစိုးရပိုင်ကျောင်းတွေကတော့ ၈၃.၁၃ ရာခိုင်နှုန်းနဲ့ အောင်ချက်အနည်းဆုံး ဖြစ်နေတာကို တွေ့ရပါတယ်။
ဒီနှစ် ထွက်ပေါ်လာတဲ့ ရလဒ်တွေဟာ ဘာသာရပ်ခွဲအားလုံးမှာ ပညာရေးစွမ်းဆောင်ရည် တည်ငြိမ်မှုရှိနေတာကို ပြသနေပြီး၊ တစ်ပြည်နယ်လုံး အတိုင်းအတာနဲ့ အောင်မြင်မှုနှုန်း မြင့်မားနေတယ်လို့ တာဝန်ရှိသူတွေက သုံးသပ်ထားပါတယ်။
ပြီးခဲ့တဲ့ ၂၀၂၄ ခုနှစ်မှာ အောင်ချက် ၇၈ ရာခိုင်နှုန်းဝန်းကျင်သာ ရှိခဲ့ရာကနေ ၂၀၂၅ ခုနှစ်မှာ ၈၁ ရာခိုင်နှုန်းကျော်အထိ မြင့်တက်လာခဲ့ပြီး၊ အခု ၂၀၂၆ ခုနှစ်မှာတော့ ၈၇.၆၇ ရာခိုင်နှုန်းအထိ စံချိန်တင် အောင်မြင်ခဲ့တာ ဖြစ်ပါတယ်။ ဒါကြောင့် ဒီနှစ်အောင်ချက်ဟာ ပြီးခဲ့တဲ့နှစ်နဲ့ နှိုင်းယှဉ်ရင် ၆ ရာခိုင်နှုန်းကျော် တိုးလာသလို၊ လွန်ခဲ့တဲ့ နှစ်နှစ်ကထက်စာရင်တော့ ၁၀ ရာခိုင်နှုန်းနီးပါးအထိ သိသိသာသာ တိုးတက်မြင့်မားလာတာ ဖြစ်ပါတယ်။