ချင်းလူငယ်ဖိုက်တာ Joshua Van နဲ့ ဘရာဇီးဖိုက်တာ Bruno Silva တို့ဟာလာမယ့် ဇွန်လ (၇) ရက်နေ့မှာ ကျင်းပမယ့် UFC 316 ပြိုင်ပွဲမှာ ယှဉ်ပြိုင်ထိုးသတ်ကြမှာဖြစ်တဲ့ကြောင်း Joshua Van က သူ့ရဲ့လူမှုကွန်ယက်ဖေ့ဘုတ်ကနေ တဆင့်ဖော်ပြထားပါတယ်။
Joshua Van နဲ့ Bruno Silva ကိုပြီးခဲ့တဲ့ မတ်လတုန်းက ကျင်းပတဲ့ UFC 313 မှာ ပွဲတည်ပေးခဲ့ဖူးပေမယ့် အဲဒီတုန်းက Bruno Silva က နုတ်ထွက်ခဲ့တာကြောင့် ပွဲမဖြစ်လိုက်ရဘဲ Joshua Van က ဂျပန်ဖိုက်တာနဲ့ ထိုးသတ်ခဲ့ရပြီး UFC 316 မှာ ထပ်ပြီးပွဲပြန်တည်ပေးခဲ့တာဖြစ်ပြီး ဒီတစ်ကြိမ်တော့ ထပ်ပြီးနုတ်ထွက်လို့မရတော့ဘူးလို့လည်း သိရပါတယ်။
အသက် ၃၅ နှစ် အရွယ်ရှိပြီဖြစ်တဲ့ ဘရာဇီးဖိုက်တာ Bruno Silva ဟာ အရပ် ၅ ပေ ၄ လက်မရှိပြီး ၂၀၁၅ ခုနှစ်ကနေ ၂၀၂၀ ထိ Bantamweight တန်းမှာ ထိုးခဲ့ပြီး ၂၀၂၁ ကနေ စပြီး Flyweight တန်းကို ကူးပြောင်းကာ လက်ရှိအချိန်ထိ ထိုးနေတာဖြစ်ပြီး သူ့ရဲ့ MMA Fight Record က ၂၃ ပွဲထိုး ၁၄ ပွဲနိုင် ၆ ပွဲရှုံး ၂ ပွဲသရေ ရလဒ်ရရှိထားပြီး UFC Flyweight Ranking ၁၂ သတ်မှတ်ခံထားသူဖြစ်ပါတယ်။
မြန်မာပရိသတ် အများအပြားက အားပေးနေတဲ့ အသက် (၂၃)နှစ်အရွယ် ချင်းလူငယ်ဖိုက်တာ Joshua Van ကတော့ ဖိုက်တာဘဝမှာ MMA Fight Record မှာ ၁၅ ပွဲထိုးသတ်ထားပြီး ၁၃ ပွဲနိုင်၊ ၂ ပွဲရှုံးထားပြီး UFC ပြိုင်ပွဲအတွင်းမှာလည်း ပွဲပေါင်း ၇ ပွဲအထိ ထိုးသတ်ထားပြီဖြစ်ကာ ၆ ပွဲနိုင်၊ ၁ ပွဲသာ ရှုံးထားပြီး UFC Flyweight အဆင့် ၁၄ နေရာမှာ ရှိသူလည်းဖြစ်ပါတယ်။