စက်တင်ဘာလ ၁၂ ရက်။
အိန္ဒိယနိုင်ငံ၊ မဏိပူရ်ပြည်နယ် Chandel ခရိုင်အတွင်းရှိ အိန္ဒိယ-မြန်မာ နယ်စပ်တစ်လျှောက် ရှင်းလင်းရေး စစ်ဆင်ရေး ပြုလုပ်စဉ် ဝှက်ထားတဲ့ လက်နက်ခဲယမ်းတွေနဲ့ စစ်သုံးပစ္စည်း အများအပြားကို သိမ်းဆည်းရမိခဲ့တယ်လို့ Assam Rifles တာဝန်ရှိသူတွေက ပြောကြားပါတယ်။
ထောက်လှမ်းရေး သတင်းအချက်အလက်တွေအရ Assam Rifles တပ်ဖွဲ့ဟာ စက်တင်ဘာလ ၁၁ ရက်နေ့က နယ်စပ်မှတ်တိုင် အမှတ် ၅၃ နဲ့ ၅၄ ဝန်းကျင်ဒေသတွေမှာ စစ်ဆင်ရေး စတင်ခဲ့တာ ဖြစ်ပြီး အင်အား ၂၂ ဦးပါ အဖွဲ့တစ်ဖွဲ့ကို အခြေစိုက်စခန်းဖြစ်တဲ့ Company Operating Base AibolJoupi ကနေ ညနေ ၅ နာရီခွဲခန့်မှာ စတင် စေလွှတ်ခဲ့ပါတယ်။
နယ်မြေစိုးမိုးရေး လုပ်ဆောင်ကာ သံသယရှိတဲ့ နေရာတွေကို စနစ်တကျ ရှာဖွေမှုတွေ ပြုလုပ်ပြီးနောက် စစ်ဆင်ရေးကို တစ်ညလုံး ဆက်လက် ဆောင်ရွက်ခဲ့ပါတယ်။
စစ်ဆင်ရေး ကြာချိန် ၈ နာရီနီးပါးအကြာ စက်တင်ဘာလ ၁၂ ရက် မနက် ၆ နာရီခွဲခန့်မှာတော့ COB AibolJoupi စခန်းရဲ့ တောင်ဘက် ၅ ကီလိုမီတာခန့်အကွာ၊ နယ်စပ်မှတ်တိုင် အမှတ် ၅၄ အနီးမှာ လျှို့ဝှက်ဝှက်ထားတဲ့ လက်နက်ခဲယမ်းတွေကို ရှာဖွေတွေ့ရှိခဲ့တာ ဖြစ်ပါတယ်။
သိမ်းဆည်းရမိတဲ့ လက်နက်ပစ္စည်းတွေထဲမှာ Pompi သေနတ် ၃ လက်၊ တစ်လုံးထိုး ရိုင်ဖယ် (Single-barrel rifle) ၆ လက်၊ ကာဘိုင် ၃ လက်၊ လာသိုဒ် (Lathod) သေနတ် ၂ လက်၊ အမှတ် ၃၆ လက်ပစ်ဗုံး ၂ လုံး၊ လက်လုပ်ဖောက်ခွဲရေးပစ္စည်း (IED) ၂ ခု၊ ကာဘိုင်ကျည်အိမ် ၃ ခုနဲ့ ၇.၆၂ မမ ကျည် ၅ တောင့်တို့ ပါဝင်ပါတယ်။
အခုလို ဖမ်းဆီးရမိမှုဟာ ထိရှလွယ်တဲ့ နယ်စပ်ဒေသတွေမှာ ဝှက်ထားတဲ့ လက်နက်သိုလှောင်ရုံတွေကို ရှာဖွေဖော်ထုတ်နိုင်ဖို့အတွက် အချိန်မီရရှိတဲ့ ထောက်လှမ်းရေး သတင်းအချက်အလက်တွေနဲ့ လျင်မြန်တဲ့ စစ်ဆင်ရေး တုံ့ပြန်မှုတွေရဲ့ အရေးပါမှုကို ထင်ရှားစေတယ်လို့ Assam Rifles ဘက်က ပြောပါတယ်။
ဒီစစ်ဆင်ရေးကြောင့် ဖြစ်ပေါ်လာနိုင်တဲ့ တရားမဝင် လှုပ်ရှားမှုတွေကို ဟန့်တားနိုင်ခဲ့သလို Chandel ခရိုင်အတွင်းက အိန္ဒိယ-မြန်မာ နယ်စပ်တစ်လျှောက် လုံခြုံရေးကိုလည်း ပိုမို အားကောင်းစေခဲ့တယ်လို့ အဆိုပါ တပ်ဖွဲ့က ဆိုပါတယ်။