ဇွန်လ ၁၉ ရက်။
အိန္ဒိယနိုင်ငံ၊ မီဇိုရမ်ပြည်နယ် ဝန်ကြီးချုပ် Pu Lalduhoma ဟာ ဝန်ထမ်းရေးရာနဲ့ အုပ်ချုပ်ရေးပြုပြင်ပြောင်းလဲမှုဌာန (Personnel and Administrative Reforms Department) ရဲ့ တာဝန်တွေကို လွှဲပြောင်းရယူလိုက်ပြီဖြစ်ကြောင်း ပြည်နယ်အစိုးရက ထုတ်ပြန်တဲ့ တရားဝင်သတင်းထုတ်ပြန်ချက်အရ သိရပါတယ်။
ဒီဌာနရဲ့ ဝန်ကြီးအဆင့် တာဝန်တွေကို အရင်က ကက်ဘိနက်ဝန်ကြီး K. Sapdanga က ကိုင်တွယ်ခဲ့တာဖြစ်ပြီး၊ သူကတော့ ပြည်ထဲရေးဌာန၊ မြို့ပြဖွံ့ဖြိုးတိုးတက်ရေးဌာနနဲ့ ဆင်းရဲနွမ်းပါးမှုပပျောက်ရေးဌာနတွေကို ဆက်လက်ကြီးကြပ်သွားမှာ ဖြစ်ပါတယ်။
ဇွန်လ ၁၈ ရက် နေ့က နိုင်ငံရေးနှင့် ကက်ဘိနက်ဌာနက ထုတ်ပြန်ခဲ့တဲ့ ကြေညာချက်မှာတော့ အများပြည်သူဝန်ဆောင်မှုလုပ်ငန်းတွေ အကျိုးရှိစေဖို့အတွက် အဆိုပါဌာနကို ဝန်ကြီးချုပ်ထံ ချက်ချင်းလွှဲပြောင်းပေးအပ်လိုက်တာဖြစ်ပြီး၊ ရလဒ်အနေနဲ့ ဝန်ကြီး Sapdanga ကို ဝန်ထမ်းရေးရာနဲ့ အုပ်ချုပ်ရေးပြုပြင်ပြောင်းလဲမှုဌာန တာဝန်ကနေ ကင်းလွတ်ခွင့်ပြုလိုက်တယ်လို့ ဖော်ပြထားပါတယ်။
အခုလို ဝန်ကြီးဌာန တာဝန်အပြောင်းအလဲလုပ်မှုဟာ အာဏာရ Zoram People’s Movement (ZPM) ပါတီအတွင်း သဘောထားကွဲလွဲမှုတွေ ရှိနေတယ်ဆိုတဲ့ နိုင်ငံရေးအရ ဆွေးနွေးဝေဖန်မှုတွေ ထွက်ပေါ်နေတဲ့အချိန်မှာပဲ ဖြစ်လာတာပါ။ ပြီးခဲ့တဲ့ ကြာသပတေးနေ့က အတိုက်အခံခေါင်းဆောင် Lalchhandama Ralte က ZPM ပါတီအတွင်း အက်ကြောင်းထွက်နေပြီး ဒါဟာ ပါတီရဲ့ လုပ်ငန်းဆောင်ရွက်မှုတွေအပေါ် သက်ရောက်မှုရှိနိုင်တယ်လို့ ပြောဆိုခဲ့ပါတယ်။
ဒါပေမဲ့ ဝန်ကြီးချုပ် Lalduhoma ကတော့ ဒီစွပ်စွဲချက်တွေကို ပယ်ချလိုက်ပြီး ZPM ပါတီအတွင်း ဘာအက်ကြောင်းမှမရှိသလို ပါတီရဲ့ လွှတ်တော်အမတ်တွေအားလုံးဟာ စည်းလုံးညီညွတ်စွာ ရှိနေကြတယ်လို့ တုံ့ပြန်ပြောဆိုခဲ့ပါတယ်။
အစိုးရဘက်ကတော့ ဒီလို ဝန်ကြီးဌာနတာဝန် ပြောင်းလဲသတ်မှတ်ရတဲ့အပေါ် တရားဝင်ထုတ်ပြန်ချက်မှာ ပါရှိတဲ့အတိုင်းကလွဲလို့ တခြားတိကျတဲ့ အကြောင်းပြချက်တစ်စုံတစ်ရာကို ဖြည့်စွက်ပြောကြားခြင်း မရှိပါဘူး။
မီဇိုရမ်ပြည်နယ် ZPM ပါတီအစိုးရအဖွဲ့ကို ဦးဆောင်နေတဲ့ ဝန်ကြီးချုပ် Lalduhoma ဟာ အခုအခါမှာတော့ သူရယူထားတဲ့ လက်ရှိတာဝန်တွေအပြင် အဆိုပါ ဝန်ထမ်းရေးရာနဲ့ အုပ်ချုပ်ရေးပြုပြင်ပြောင်းလဲမှုဌာနကိုပါ တိုက်ရိုက် ကိုင်တွယ်ကြီးကြပ်သွားမှာ ဖြစ်ပါတယ်။