မတ်လ ၂၅ ရက်။
မကွေးတိုင်း၊ ဂန့်ဂေါမြို့နဲ့ ချင်းပြည်နယ်ကို ဆက်သွယ်ထားတဲ့ လမ်းကြောင်းပေါ်က အဓိကကျတဲ့ လမ်းလေးခုဆုံရာ ရှောက်ပင်အောင်မြင်ရွာမှာ စစ်တပ်ဘက်က ပြီးခဲ့တဲ့ မတ်လ ၁၈ ရက်ကစလို့ စစ်ကြောင်းထိုးလာပြီး အမာခံ ဘန်ကာတွေဆောက်ကာ စခန်းထိုင်တာတွေဟာ တောင်ပေါ်နဲ့ မြေပြန့် စစ်ရေးချိတ်ဆက်ပြီး လမ်းမကြီးတွေကို ပြန်လည်ထိန်းချုပ်ချင်လို့ အခုလိုလုပ်လာတာဖြစ်တယ်လို့ ချင်းအမျိုးသားတပ်ဦး (CNF/CNA)ရဲ့ ေ ပြာရေးဆိုခွင့်ရှိသူ ဆလိုင်းထက်နီက ပြောပါတယ်။
ချင်းအမျိုးသားတပ်ဦး (CNF/CNA)ရဲ့ ပြောရေးဆိုခွင့်ရှိသူ ဆလိုင်းထက်နီက “တောင်ပေါ်နဲ့ မြေပြန့်မြေပြင်စစ်ရေးချိတ်ဆက်ပြီး လမ်းမကြီးတွေကို ပြန်လည်ထိန်းချုပ်ချင်တယ် အဓိက နယ်မြေစိုးမိုးရေးပေါ့ အခုလိုလုပ်တာက ကုန်စည်စီးဆင်းမှုတွေကို ကန့်သတ်လာနိုင်တယ်၊ သူတို့လုပ်နေကျ ဖြတ်လေးဖြတ် ဗျူဟာကို တနည်းတဖုံ အထောက်အကူပြုအောင်ပေါ့ ၊ ပြည်သူက နစ်နာမယ်၊ သူတို့က အခွန်ရမှာပေါ့” လို့ပြောပါတယ်။
ဂန့်ဂေါကနေ အင်အား ၁၀၀ ဝန်းကျင်နဲ့ စစ်ကြောင်းထိုးလာတဲ့ စစ်ကောင်စီတပ်သားတွေဟာ မကွေးတိုင်း၊ ဂန့်ဂေါမြို့နဲ့ ချင်းပြည်နယ်ကို ဆက်သွယ်ထားတဲ့ လမ်းကြောင်းပေါ်က အဓိကကျတဲ့ လမ်း ၄ ခုဆုံရာ ရှောက်ပင်အောင်မြင်ကျေးရွာမှာ အမာခံဘန်ကာတွေဆောက်ကာ စခန်းထိုင်လိုက်တာကြောင့် ဒေသခံတွေအနေနဲ့ ကူသန်းရောင်းဝယ်ရေးနဲ့ ကုန်စည်စီးဆင်းဖို့ အခက်အခဲဖြစ်နေကြတယ်လို့လည်း သိရပါတယ်။
စစ်ကောင်စီစခန်းထိုင်လိုက်တဲ့အောင်မြင်ကျေးရွာဟာ မကွေးတိုင်း၊ ယောနယ်၊ ဂန့်ဂေါမြို့နဲ့ ချင်းပြည်နယ်က ဟားခါး၊ ထန်တလန်၊ ဖလမ်း၊ တီးတိန်၊ မင်းတပ်၊မတူပီ တွေအပြင် ကလေးမြို့တွေထိကို ဆက်သွယ်ထားတဲ့ လမ်းကြောင်းပေါ်က အချက်ခြာကျတဲ့ နေရာမှာ တည်ရှိတာဖြစ်ပါတယ်။
