စက်တင်ဘာလ ၂၉ ရက်နေ့မနက်တွင် တီးတိန်မြို့နယ် Lezang ရွာသား လူငယ် ၁၀ ဦးကို Chinland Council အဖွဲ့ဝင် တော်လှန်ရေး အဖွဲ့တစ်ခုဖြစ်တဲ့ တီးတိန်မြို့နယ် အခြေစိုက် People Defense Army (PDA) မှ စစ်သင်တန်း တက်ရောက်ရန် အတင်းအဓ္ဓမ ခေါ်ဆောင်သွားခဲ့တယ် လို့ Lezang ရွာသား တစ်ဦး ထံမှ သိရပါတယ်။
“PDA တပ်ဖွဲ့ တွေက စက်တင်ဘာ ၂၈ ရက်နေ့မှာ ရောက်လာတယ်။ လူငယ်တွေကို ဆင့်ခေါ်ပြီး စစ်သင်တန်းတက်ဖို့ မဲနှိုက်ခိုင်းလိုက်တယ်။ မဲပေါက်တဲ့ သူ ၁၀ ဦးကို စက်တင်ဘာ ၂၉ ရက်နေ့ မနက်မှာ ရွာကနေ ခေါ်ဆောင်သွားခဲ့တယ်” လို့ Lezang ရွာသား တစ်ဦးမှ ပြောပါတယ်။
ဒါ့အပြင် PDA တပ်ဖွဲ့က တောင်ယာသွားသူ တချို့ကိုလည်း မှတ်ပုံတင် စစ်ပြီး မပါတဲ့လူကို သွားခွင့် မပြုဘဲ ပြန်လှည့်ခိုင်းတာမျိုး လုပ်ဆောင်ခဲ့ကြောင်း၊ မိမိတို့ ရွာ အနေဖြင့် တောင်ယာမှာ မှတ်ပုံတင် ယူလေ့ မရှိခဲ့ဘူးကြောင်း အဆိုပါ ရွာသားမှ ဆက်လက် ပြောကြား ခဲ့ပါတယ်။
Lezang ရွာသား လူငယ်များကို စစ်သင်တန်း တက်ဖို့ ခေါ်ဆောင်ခြင်းနှင့် ပတ်သက်ပြီး PDA အဖွဲ့နဲ့ နီးစပ်သူ တစ်ဦးက “အခုလို ခေါ်တာက စစ်မှုထမ်းဖို့ မဟုတ်ပါဘူး။ ပြည်သူစစ် စစ်သင်တန်း တက်ဖို့ပါ။ အရင် တခေါက်လည်း ပြုလုပ်ပြီးပြီ။ ဆက်လက် စစ်မှုထမ်းချင်တဲ့ သူတွေကိုတော့ အဖွဲ့က ခေါ်သွားတယ်။ စစ်မှုမထမ်း လိုတဲ့ သူတွေကိုတော့ ရပ်ရွာရဲ့ ပြည်သူ့စစ် အဖြစ် ဆောင်ရွက်ဖို့ ရွာပြန်ခိုင်း ခဲ့ပါတယ်။ Lezang ရွာသားတွေကိုလည်း စစ်မှုထမ်းဖို့ ခေါ်တာ မဟုတ်ပါဘူး။ ပြည်သူ့စစ် သင်တန်းတက်ဖို့ ပါ” လို့ Chin World Media ကို ပြောပါတယ်။
Lezang ရွာသားတွေကို မဲနှိုက်ပြီး လူရွေးတာဟာလည်း ရွာသားများ အနေဖြင့် ပြည်သူ့ စစ် သင်တန်း တက်ရောက်ဖို့ ရွေးချယ်ရာမှာ အခက်အခဲ ဖြစ်ခဲ့တာကြောင့် အခုလို ရွေးချယ်ခြင်း ဖြစ်တယ် လို့လည်း PDA အဖွဲ့ နဲ့ နီးစပ်သူ ထံမှ ဆက်လက် သိရှိရပါတယ်။