လက်ရှိကာလ ပူဆွေးနေရမှုများအတွက် ပြည်သူမှ ပြည်သူသို့ အချင်းချင်း အားပေးနှစ်သိမ့်ရန် အမျိုးသားညီညွတ်ရေးအစိုးရအနေဖြင့် ၁၃-၄-၂၀၂၅ နေ့မှ ၂၀-၄-၂၀၂၅ နေ့အထိကို နိုင်ငံလုံးဆိုင်ရာ ပြည်သူ့ဝမ်းနည်းကြေကွဲမှုနှင့် နှစ်သိမ့်အားပေးမှု ရက်သတ္တပတ်အဖြစ် သတ်မှတ်ကြောင်း အမျိုးသားညီညွှတ်ရေးအစိုးရ (NUG) က ဒီကနေ့ ဧပြီလ ၂ ရက်နေ့မှာ ကြေညာခဲ့ပါတယ်။
မတ်လ ၂၈ ရက်နေ့တွင် အင်အား ၇.၇ ပမာဏရှိ ငလျင်ကြီး (Major Earthquake) နှင့် နောက်ဆက်တွဲ ငလျင်ငယ်များ လှုပ်ခတ်ခဲ့မှုကြောင့် မြန်မာနိုင်ငံနှင့် အိမ်နီးနားချင်းနိုင်ငံများတွင် အသက် အိုးအိမ် ပျက်စီးဆုံးရှုံးမှုများစွာ ဖြစ်ပေါ်ခဲ့ကြောင်း အမျိုးသားညီညွတ်ရေးအစိုးရအနေဖြင့် မိမိတို့၏ စိုးမိုးနယ်မြေများတွင် ငလျင်ဘေးဒဏ်သင့်လူထုကို ၇၂ နာရီအတွင်း ကူညီကယ်ဆယ်မှုများ အပြည့်အဝအားစိုက်လုပ်နိုင်ခဲ့သော်လည်း စစ်ကောင်စီ စိုးမိုးဒေသများတွင် ကိုယ်ထိလက်ရောက် ဝင်ရောက်မကူညီနိုင်ခဲ့သည့်အတွက်လည်း များစွာ ဝမ်းနည်းစိတ် မကောင်းဖြစ်ရပြီး ငလျင်ဘေးသင့် ပြည်သူလူထုကို လေးနက်စွာ တောင်းပန်အပ်တယ်လို့လည်း NUG ရဲ့ထုတ်ပြန်ချက်မှာ ဖော်ပြပါတယ်။
ပြည်သူ့ဝမ်းနည်းကြေကွဲမှုနှင့် နှစ်သိမ့်အားပေးမှု ရက်သတ္တပတ် ကာလအတွင်း ပြည်တွင်းပြည်ပနေ ပြည်သူများအနေဖြင့် ပြည်သူမှ ပြည်သူသို့ နှစ်သိမ့်အားပေး ခြင်းများကို တဦးချင်းအနေဖြင့်ဖြစ်စေ၊ အစု အဖွဲ့များအနေဖြင့်ဖြစ်စေ ကုသိုလ်ကောင်းမှု၊ ဆုတောင်းမှု၊ ငလျင်ဒဏ်ခံ ပြည်သူများအား စာနာရိုင်းပင်းကြောင်း ပြသသည့် လုပ်ဆောင်မှုများကို ဆောင်ရွက်ကြပါရန် တိုက်တွန်း နှိုးဆော်အပ်တယ်လို့လည်း NUG က ထုတ်ပြန်ထားပါတယ်။
လက်ရှိငလျင်ဘေးဒဏ်သင့်ပြည်သူတွေ လာရောက်ကူညီနေကြတဲ့ နိုင်ငံတကာ အလှူရှင် ကျွမ်းကျင်ပညာရှင်တွေနဲ့ နိုင်ငံတကာက နိုင်ငံကြီးတွေကနေ အလျင်အမြန် ကူညီပေးတဲ့အတွက် အမျိုးသားညီညွှတ်ရေးအစိုးရ အနေနဲ့ အထူးကျေးဇူးတင်ရှိတယ်လို့လည်း ဧပြီ ၁ ရက်နေ့က ကျင်းပခဲ့တဲ့ အမျိုးသားညီညွှတ်ရေးအစည်းအဝေးမှာ ယာယီသမ္မတ ဒူဝါလရှီးလက ပြောပါတယ်။
အမျိုးသားညီညွှတ်ရေးအစိုးရ ယာယီသမ္မတ ဒူဝါလရှီးလက “စစ်ကိုင်းနဲ့ မန္တလေးတို့ဟာ ကျွန်တော်တို့ နိုင်ငံရဲ့ တကယ့် မြို့ကြီးတွေဖြစ်ပါတယ်။ သမိုင်းဆိုင်ရာ အမွေအနှစ်နဲ့ ဘာသာရေးဆိုင်ရာ အမွေအနှစ်တွေလည်း နှစ်ပေါင်းရာချီ သက်တမ်းရှိတဲ့ သမိုင်းအမွေအနှစ်တွေ ကိန်းအောင်းတည်ရှိရာ မြို့ကြီးတွေ ဖြစ်ပါတယ်။ ၂၀၂၅ ခုနှစ် စစ်ကိုင်း ပြတ်ရွေ့ငလျင်ကြီးဟာ ၂၀၀၈ ခုနှစ်က ဖြစ်ပွားခဲ့တဲ့ နာဂစ်မုန်တိုင်းအပြီးနောက်ပိုင်းမှာ ကျွန်တော်တို့ နိုင်ငံအတွက် အဆိုးရွားဆုံးနဲ့ အပြင်းထန်ဆုံးသော သဘာဝကပ်ဘေးကြီးဖြစ်တယ်လို့ ပြောနိုင်မယ် ထင်ပါတယ်။ ငလျင်ဘေးဒဏ်ကို ခံစားရတဲ့ ပြည်သူတွေရဲ့ မျက်ရည်တွေနဲ့ ဝမ်းနည်းပူဆွေးမှုတွေကို ကျွန်တော့်အနေနဲ့ ထပ်တူ ခံစားဝမ်းနည်းမိပါတယ်။ တစ်ဖက်မှာလည်း စစ်ကောင်စီရဲ့ အာဏာသိမ်းမှု နောက်ဆက်တွဲ အကျိုးဆက်တွေကို ပြည်သူတွေဟာ လိုသည်ထက်ပိုပြီး အမြောက်အမြား ခံစားနေကြရတယ်ဆိုတာ တွေးမိပြီး၊ ခံပြင်းမိတာတွေလည်း ရှိပါတယ်။ ဒီစစ်အာဏာရှင်စနစ်ဆိုးကို အမြန်ဆုံး မချေမှုန်းနိုင်သရွေ့၊ ပြည်သူလူထုခံစားရတဲ့ ဒုက္ခတွေဟာ တတိတိနဲ့ တစိမ့်စိမ့် ခံစားနေရသလို ဖြစ်နေမယ်လို့ ယူဆပါတယ်။ ” လို့ ပြောကြားခဲ့ပါတယ်။
ဒါ့ပြင် စစ်ကောင်စီရဲ့ ညံ့ဖျင်းတဲ့ စီမံမှုကြောင့် ကိုဗစ်တတိယလှိုင်းမှာ ထောင်နှင့်ချီသော ပြည်သူ ပြည်သားများ အသက်ဆုံးပါးခဲ့ရကာ၊ မုန်တိုင်း၊ ရေကြီးမှုများမှာ လည်း မဆုံးရှုံးသင့်သော အသက်ပေါင်းများစွာ ဆုံးရှုံး ခဲ့ကြရကြောင်းနဲ့ စစ်တပ်ရဲ့လေကြောင်းတိုက်ခိုက်မှု၊ စစ်ကြောင်းထိုးမှု၊ ရွာများကို မီးရှို့ဖျက်ဆီးမှုများကြောင့်လည်း လူ့အသက်ပေါင်းများစွာ ဆုံးရှုံးခဲ့ရပါကြောင်း၊ ငလျင်ဘေးဒဏ်ခံရချိန်တွင်ပင် စစ်ကောင်စီက လေကြောင်းတိုက်ခိုက်မှုများကို နေ့စဉ်ရက်ဆက် လူသားမဆန်စွာလုပ်ဆောင်နေဆဲပင်ဖြစ်ကြောင်း၊အမျိုးသားညီညွတ်ရေးအစိုးရအနေဖြင့် ဒီဖြစ်ရပ်များအားလုံးကို ဘယ်သောအခါမှ မေ့ပျောက်မည် မဟုတ်သလို ဒီဖြစ်ရပ်တွေအတွက်လည်း တရားမျှတမှု ပြန်လည်ရရှိရေးအတွက်လည်း အစွမ်းကုန် ကြိုးပမ်း ဆောင်ရွက်သွားမည် ဖြစ်တယ်လို့လည်း NUG က ထုတ်ပြန်ထားပါတယ်။
