မြန်မာပြည်သူထောင်ချီသေဆုံးခဲ့ရပြီး ပြည်သူသိန်းချီအိုးအိမ်မဲ့ဖြစ်ခဲ့ရတဲ့ ငလျင်ဘေးကြီးမှာ မြန်မာပြည်သူတွေကိုကူညီကယ်ဆယ်ရေးမှာပါဝင်တဲ့ လူမှုကူညီရေးအသင်းအဖွဲ့များစွာရှိတဲ့အနက် ချင်းတောင်ခြေ စစ်ကိုင်းတိုင်း၊ကလေးမြို့က လူမှုကူညီ ရေးအဖွဲ့များလည်းအပါအဝင်ဖြစ်ပါတယ်။
ငလျင်ဘေးဒဏ်သင့်ပြည်သူတွေကို ကူညီကယ်တင်ဖို့ စစ်ကိုင်းတိုင်း၊ ကလေးမြို့ကနေ မတ်လ ၃၀ ရက်နေ့မှာ စတင်ထွက်ခွာသွားတဲ့ ကလေးမြို့က လူမူ့ကူညီရေးအသင်းအဖွဲ့တွေရဲ့ ကားတွေဟာ ငလျင်ဗဟိုချက်ဖြစ်ခဲ့တဲ့ စစ်ကိုင်းမြို့ကို မတ်လ ၃၁ ရက် နေ့လည် ၁ နာရီခွဲလောက်မှာ ရောက်ရှိနေပြီလို့ ဇိုမီးလူငယ် လူမူ့ကူညီရေးအသင်း (ZYA) ဥက္ကဌ Ko Khup Boih က ပြောပါတယ်။
ကလေးမြို့က ကာယကံမေတ္တာ လူမူ့ကူညီရေး၊ ပုညကုတလ လူမူ့ကူညီရေး၊ မွန်ထာလူမူကူညီရေး၊ ကြိုးသုံးပင် လူမူ့ကူညီရေး၊ ZYA (HQ)၊ Tahan ZYA စတဲ့လူမူ့ကူညီရေး အသင်းအဖွဲ့ ၆ ခုက လူဦးရေ စုစုပေါင်း ၃၀ ဝန်းကျင် ဟာ ငလျင် ဘေး ကြောင့် လူ သေဆုံးမှု/အ ဆောက်အဦးထိခိုက်ပျက်စီးမှုအလွန်အများပြားတဲ့ စစ်ကိုင်းမြို့ကို ရောက်ရှိချိန်မှစပြီး စစ်ကိုင်းမြို့မှာ ရောက်နေတဲ့ တခြားကယ်ဆယ်ရေးအဖွဲ့ တွေနဲ့လက်တွဲပြီး အချိန်ပြည့် မရပ်မနားပဲ ငလျင်ဒဏ်သင့်ပြည်သူလူထုကို ကူညီကယ်ဆယ်ရေးလုပ်ငန်း တွေလုပ် ဆောင် နေတယ်လို့သိရပါတယ် ။
လက်ရှိအချိန်အထိ မြန်မာနိုင်ငံမှာ ငလျင်ဒဏ်ကြောင့် သေဆုံးသူ ၂၇၁၉ ဦးထိရှိလာပြီး၊ ဒဏ်ရာရသူ ၄၅၂၁ ဦးနဲ့ ပျောက်ဆုံးသူ ၄၄၁ ဦးရှိနေပြီလို့ ဧပြီလ ၁ ရက်နေ့ နေ့လည်က နေပြည်တော်မှာ ကျင်းပပြုလုပ်ခဲ့တဲ့ ငလျင်ဘေးသင့်ပြည်သူတွေအတွက် အလှူငွေပေးအပ်ပွဲမှာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောခဲ့ပါတယ်။