မတ်လ ၁၀ ရက်။
ချင်းပြည်နယ်၊ ဖလမ်းမြို့နယ်မှာ ၂၀၂၅ ခုနှစ်၊ အောက်တိုဘာလ ကနေ ၂၀၂၆ ခုနှစ်၊ ဖေဖော်ဝါရီလအတွင်း ဖြစ်ပွားတဲ့ တိုက်ပွဲပဋိပက္ခတွေအတွင်း အရပ်သားပြည်သူ အနည်းဆုံး ၁၅ ဦးကျော် သေဆုံးပြီး ၊ ၃၀ ကျော် ထိခိုက်ဒဏ်ရာရခဲ့ပြီလို့ ချင်းရေးရာအဖွဲ့ချုပ်(ICA)ရဲ့ မတ်လ ၉ ရက်နေ့ ထုတ်ပြန်တဲ့ အစီရင်ခံစာအရ သိရပါတယ်။
အရပ်သားပြည်သူ ထိခိုက်သေဆုံးမှုတွေမှာ ကျောင်း၊ ဘုရားကျောင်းနှင့် ဆေးရုံအနီး ပစ်ခတ်မှုတွေကြောင့် ထိခိုက်မှု ဖြစ်စေသလို မြေမြှုပ်မိုင်းနှင့် လက်နက်ကြီးပစ်ခတ်မှုတွေကြောင့်လည်း သာမန်ပြည်သူတွေ ထိခိုက်ဒဏ်ရာရှိတာကိုလည်း တွေ့ရှိရတယ်လို့ ICA က ဆိုပါတယ်။
ဒီလိုအချက်အလက်တွေဟာ အရပ်သားကာကွယ်ရေးမလုံလောက်မှုကို ပြသနေပြီး လူ့အခွင့်အရေးနှင့် အပြည်ပြည်ဆိုင်ရာ လူသားချင်းစာနာထောက်ထားမှုဥပဒေ ( IHL) လေးစားလိုက်နာမှုမရှိတဲ့ လက္ခဏာတွေကို ညွှန်းပြနေတယ်လို့ ICA က ဆိုပါတယ်။
၅ လတာ တိုက်ပွဲအတွင်း ချင်းတော်လှန်ရေးတပ်ဖွဲ့တွေဘက်ကလည်း အနည်းဆုံး ၄၂ ယောက်ကျော်ရှိပြီး ထိခိုက်ဒဏ်ရာရသူ ၁၀၀ ကျော်ရှိပြီး လေကြောင်းတိုက်ခိုက်မှု ၊ ဒရုန်းဗုံးကြဲမှုတွေက တပ်ဖွဲ့ဝင်တွေအပေါ် အဓိကထိခိုက်မှုဖြစ်စေတဲ့ အကြောင်းအရင်းတွေဖြစ်တာကို တွေ့ရတယ်လို့ ဖော်ပြထားတာတွေ့ရပါတယ်။
တိုက်ပွဲတွေအတွင်း စစ်ကော်မရှင်တပ်ဖွဲ့တွေဘက်လည်း သေဆုံးမှု ၂၀၀ ကျော်ရှိပြီး ဒဏ်ရာရရှိသူ ၂၅၀ ကျော်နဲ့ ဖမ်းဆီးခံရသူ ၄၀ ကျော် ရှိတယ်လို့လည်း ICA ရဲ့ ဖော်ပြချက် အရ သိရပါတယ်။
စစ်ကော်မရှင်တပ်ဖွဲ့ဟာ လေကြောင်းတိုက်ခိုက်မှုတွေ နဲ့ ဒရုန်းအသုံးပြုပြီး အရပ်သားနေအိမ် ၊ ကျောင်းတွေ ၊ ဘုရားကျောင်းတွေ ၊ ဆေးရုံတွေကို ပစ်မှတ်ထားတိုက်ခိုက်နေတာဖြစ်ပြီး လူ့အခွင့်အရေးနှင့် လူသားချင်းစာနာထောက်ထားမှု ဥပဒေများအရ စိုးရိမ်ဖွယ်ရာဖြစ်တယ်လို့လည်း ဆိုပါတယ်။
စစ်ကော်မရှင်တပ်ဖွဲ့ရဲ့ စစ်ကြောင်းထိုး တိုက်ခိုက်မှုတွေကြောင့် ကလေး – သိုင်းငင်း၊ ကလေး – ဝေဘူလလမ်းဘေးတစ်လှောက်ရှိ တီးတိန်မြို့နယ်နဲ့ ဖလမ်းမြို့နယ်ရှိ ကျေးရွာပေါင်း ၃၄ ရွာက ဒေသခံပြည်သူတွေဟာ တောတောင်တွေထဲ စစ်ကြောင်း နဲ့ အလှမ်းဝေးရာ ကျေးရွာတွေကို ထွက်ပြေးတိမ်းရှောင်နေရတယ်လို့လည်း ဖော်ပြထားတာတွေ့ရပါတယ်။
လေကြောင်းတိုက်ခိုက်မှုတွေအပေါ် အပြည်ပြည်ဆိုင်ရာက စုံစမ်းစစ်ဆေးမှုပြုလုပ်ရန်နဲ့ အရပ်သားကာကွယ်ရေး နဲ့ လူသားချင်းစာနာထောက်ထားမှု အကူအညီတွေကို တိုးမြှင့်ပေးရန်လိုအပ်နေကြောင်းကိုလည်း ICA က အကြံပြုထားပါတယ်။