မတ်လ ၂၇ ရက်။
မြန်မာနိုင်ငံမှာ စစ်အာဏာသိမ်းပြီးချိန်မှ စပြီး ယခုလအထိ ချင်းပြည်နယ်အတွင်း စစ်ကော်မရှင်ရဲ့ လက်ချက်ကြောင့် သေဆုံးခဲ့ရတဲ့ ကလေးသူငယ် ၁၀၆ ဦးအထိ ရှိလာခဲ့ပြီး အဲဒီထဲမှာ လေကြောင်းတိုက်ခိုက်မှုကြောင့် သေဆုံးရသူ အရေအတွက်ဟာ အများဆုံးဖြစ်တယ်လို့ ချင်းလူ့အခွင့်အရေးအဖွဲ့ (CHRO) က ဒီနေ့ မတ်လ ၂၇ ရက်နေ့မှာ နောက်ဆုံးအချက်အလက်တွေကို ထုတ်ပြန်လိုက်ပါတယ်။
CHRO ရဲ့ မှတ်တမ်းပြုစုချက်တွေအရ အာဏာသိမ်းချိန်ကစပြီး ဒီနေ့အထိ ချင်းပြည်နယ်မှာ အသက် ၁၈ နှစ်မပြည့်သေးတဲ့ ကလေးသူငယ် ၁၀၆ ဦး သေဆုံးခဲ့ရတာဖြစ်ပါတယ်။ သေဆုံးရတဲ့ အကြောင်းရင်းတွေကို ကြည့်မယ်ဆိုရင် လေကြောင်းကနေ ဗုံးကြဲတိုက်ခိုက်မှုတွေကြောင့် ၅၃ ဦး သေဆုံးခဲ့ရပြီး ဒါဟာ စုစုပေါင်းသေဆုံးမှုရဲ့ ထက်ဝက်နီးပါး ရှိနေတာကို တွေ့ရပါတယ်။
ဒါ့အပြင် စစ်ကော်မရှင်ရဲ့ လက်နက်ကြီး ပစ်ခတ်မှုနဲ့ ဗုံးပေါက်ကွဲမှုတွေကြောင့် ကလေးငယ် ၃၈ ဦး သေဆုံးခဲ့ရသလို၊ သေနတ်နဲ့ ပစ်ခတ်ခံရမှုကြောင့်လည်း ကလေးငယ် ၁၅ ဦး မတရားသဖြင့် အသက်ဆုံးရှုံးခဲ့ရတယ်လို့ သိရပါတယ်။ အဆိုပါ သေဆုံးသွားသူတွေထဲမှာ နို့စို့အရွယ် ကလေးငယ်တွေလည်း ပါဝင်နေတာဖြစ်ပါတယ်။
ချင်းလူ့အခွင့်အရေးအဖွဲ့ (CHRO) အချက်အလက်တွေအရ ၂၀၂၅ ခုနှစ် နိုဝင်ဘာလကနေ ၂၀၂၆ ခုနှစ်အတွင်း စစ်ကော်မရှင်ဟာ ချင်းပြည်နယ်မှာ လေကြောင်းတိုက်ခိုက်မှုတွေကို အရှိန်မြှင့်လုပ်ဆောင်ခဲ့တာကြောင့် အရပ်သား သေဆုံးမှုနှုန်း ပိုမိုမြင့်တက်လာတယ်လို့ CHRO က မှတ်တမ်းတင်ထားပါတယ်။
CHRO ရဲ့ ထုတ်ပြန်ချက်အရ ၂၀၂၆ ဖေဖော်ဝါရီလ ၁၀ ရက်နေ့မှာ ထန်တလန်မြို့နယ်၊ တလန်ခွာကျေးရွာကို လေကြောင်းကနေ Double-tap (နှစ်ကြိမ်ဆင့်) ဗုံးကြဲတိုက်ခိုက်ခဲ့ပါတယ်။ အဲဒီတိုက်ခိုက်မှုကြောင့် လူနေအိမ်ဆောက်လုပ်ရေးခွင်က အရပ်သား ၆ ဦး သေဆုံးခဲ့ပြီး ကျောင်းသား ၄ ဦး အပါအဝင် ၇ ဦး ဒဏ်ရာရရှိခဲ့ပါတယ်။
အမျိုးသားညီညွတ်ရေးအစိုးရ (NUG)၊ လူ့အခွင့်အရေးဆိုင်ရာဝန်ကြီးဌာနရဲ့ ထုတ်ပြန်ချက်တွေအရ ၂၀၂၅ ခုနှစ် နိုဝင်ဘာလတစ်လတည်းမှာတင် တစ်နိုင်ငံလုံးအတိုင်းအတာနဲ့ စစ်ကော်မရှင်က လေကြောင်းတိုက်ခိုက်မှုပေါင်း ၁၈၄ ကြိမ် ပြုလုပ်ခဲ့ပြီး အရပ်သား ၁၃၀ ဦး သေဆုံးခဲ့တယ်လို့ ဆိုပါတယ်။
အဲဒီသေဆုံးသူတွေထဲမှာ ကလေးငယ် ၁၇ ဦး ပါဝင်နေပြီး ၂၀၂၆ ခုနှစ်အစောပိုင်းကာလတွေအထိ စစ်ကော်မရှင်ဟာ လူနေထိုင်ရာ ကျေးရွာတွေ၊ စာသင်ကျောင်းတွေနဲ့ ဘာသာရေးအဆောက်အအုံတွေကို ဦးတည်ပြီး လေကြောင်းကနေ ဗုံးကြဲတိုက်ခိုက်မှုတွေကို တစိုက်မတ်မတ် လုပ်ဆောင်နေတယ်လို့ NUG က အစီရင်ခံထားပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ မှတ်တမ်းပြုစုချက်တွေအရ ၂၀၂၅ ခုနှစ်ဟာ အာဏာသိမ်းပြီးနောက်ပိုင်း လေကြောင်းတိုက်ခိုက်မှုကြောင့် အရပ်သား သေဆုံးမှု အများဆုံးနှစ်ဖြစ်ခဲ့ပြီး ၂၀၂၆ ခုနှစ် မတ်လအထိ သေဆုံးသူစာရင်းတွေ ဆက်လက်တိုးပွားနေတယ်လို့ ဖော်ပြထားပါတယ်။
စစ်ကော်မရှင်ဟာ စစ်မြေပြင်မှာ အရှုံးနဲ့ရင်ဆိုင်နေရတာကို တုံ့ပြန်တဲ့အနေနဲ့ လေကြောင်းအင်အားကို အလွန်အကျွံအသုံးပြုပြီး အရပ်သားတွေကို ပစ်မှတ်ထားတိုက်ခိုက်နေတာကြောင့် ၂၀၂၅ နှောင်းပိုင်းကနေ ၂၀၂၆ ခုနှစ်အတွင်း ကလေးသူငယ်တွေအပါအဝင် မပြစ်မှားတဲ့ ပြည်သူတွေရဲ့ အသက်ဆုံးရှုံးမှုဟာ ယခင်နှစ်တွေထက် ၅၀ ရာခိုင်နှုန်းကျော် မြင့်တက်လာတယ်လို့ AAPP က ထောက်ပြထားပါတယ်။