ဒီဇင်ဘာလ ၁၅ ရက်။
စစ်ကိုင်းတိုင်း၊ ကလေးမြို့ပေါ်မှာ ဒီဇင်ဘာလ ၁၄ ရက်နေ့က စစ်မှုထမ်းဖို့အတွက် လူငယ် အယောက် ၁၀ ယောက်ထက်မနည်းကို လမ်းမပေါ် ဖမ်းဆီးခေါ်ဆောင်တာတွေကို စစ်ကော်မရှင်တပ်ဖွဲ့ဘက်က လုပ်ခဲ့တယ်လို့ ဒေသခံတွေဆီကနေ သိရပါတယ်။
ဒေသခံတစ်ဦးက “မနေ့ညနေ ၄ နာရီခွဲဝန်းကျင်လောက်မှာ စစ်မှုထမ်းအတွက် ၁၀ ယောက်ထက်မနည်း ဆွဲခံရတယ် တာဟန်း ဘက်မှာ ၃ ယောက်၊ ဆိပ်ကမ်းသာ ဘက်မှာ ၄ ယောက် ၊ ရွှေကျောင်းတော်ဘက်မှာ ၃ ယောက် လမ်းမှာပဲ ဆွဲသွားတာ” လို့ ပြောပါတယ်။
ကလေးမြို့မှာ စစ်ကော်မရှင်တပ်ဖွဲ့နဲ့ ပျူစောထီးအဖွဲ့တွေဟာ စစ်မှုထမ်းအတွက် လူငယ်ရှိတဲ့ နေအိမ်တွေကို ညပိုင်းမှာ နေအိမ်ပေါ်အထိ တက်ဖမ်းတာတွေကို အရင်က လုပ်ခဲ့ပြီး စစ်မှုထမ်းအတွက် ဖမ်းဆီးတာတွေကို ရပ်နားတာမရှိဘဲ ရရင်ရသလို ဖမ်းဆီးစုဆောင်းတာတွေ ဆက်တိုက် လုပ်နေတယ်လို့လည်း ဒေသခံတွေဆီကနေ သိရပါတယ်။
စစ်ကော်မရှင်တပ်ဖွဲ့ဟာ စစ်မှုထမ်းဖို့အတွက် လူငယ်များကို လစဉ်ပေါ်တာဆွဲ ဖမ်းဆီးတာတွေလုပ်နေပြီး စစ်မှုထမ်းအပတ်စဉ် ၂၁ စတင်ဖို့ အတွက်လည်း တခြားတိုင်းဒေသ/ပြည်နယ်တွေမှာ ဖမ်းဆီးပေါ်တာဆွဲတဲ့ သတင်းတွေလည်း ထွက်ပေါ်နေပါတယ်။