နို၀င်ဘာလ ၂၆ ရက်။
CDF – Mindat တပ်ဖွဲ့က ထိန်းချုပ်ထားတဲ့ ချင်းပြည်နယ်တောင်ပိုင်း မင်းတပ်မြို့နယ် တိုက်နယ် ၂ အတွင်းရှိ ကျေးရွာတစ်ရွာအနီးကို စစ်ကော်မရှင်တပ်က မနေ့ည နိုဝင်ဘာလ ၂၅ ရက်နေ့ ည ၁၀ နာရီခွဲလောက်မှာ လေကြာင်းကနေ ဗုံး ၄ လုံးကြဲချတိုက်ခိုက်ခဲ့လို့ အရပ်သား ပြည်သူနေအိမ်အချို့ ထိခိုက်ပျက်ဆီးခဲ့ရတယ်လို့ မင်းတပ်ဒေသခံ HKl Mindat ရဲ့ ဖော်ပြချက်အရ သိရပါတယ်။
မင်းတပ်မြို့နယ် တိုက်နယ် ၂ အတွင်းက ကျေးရွာတစ်ရွာအနီးကို ဂျက်ဖိုက်တာတစ်စီးက ည ၁၀ နာရီ ၄၀ မိနစ်၊ ၄၄ မိနစ် တွေမှာ ၂ ကြိမ် ဗုံး ၄ လုံးကြဲချပြီး အကြောင်းမဲ့ လေကြာင်းတိုက်ခိုက်ခဲ့လို့ ပြည်သူနေအိမ် အချို့ ထိခိုက်ပျက်ဆီးခဲ့တယ်တယ်လို့ သိရတဲ့ကြောင်း မင်းတပ်ဒေသခံ HKl Mindat ရဲ့လူ့မှုကွန်ယက်မှာ ဖော်ပြထားချက်အရ သိရပါတယ်။
မင်းတပ်မြို့နယ် တိုက်နယ် ၂ အတွင်း စစ်ကော်မရှင်တပ်ဖွဲ့ရဲ့ လေကြောင်းတိုက်ခိုက်မှု အခြေအနေနဲ့ ပက်သက်ပြီး အသေးစိတ် အခြေအနေ သိရှိရဖို့ CDF – Mindat အဖွဲ့ဘက်ကို ဆက်သွယ်မေးမြန်းထားဆဲဖြစ်ပါတယ်။
CDF – Mindat က ထိန်းချုပ်ထားတဲ့ မင်းတပ်မြို့နယ်ကို ပြီးခဲ့တဲ့ အောက်တိုဘာလကလည်း စစ်ကော်မရှင်တပ်ဖွဲ့ရဲ့ လေကြောင်းတိုက်ခိုက်မှုတွေကြောင့် အရပ်သား ထိခိုက် သေဆုံးမှုတွေ ဖြစ်ပွားခဲ့ပါတယ်။
မင်းတပ်မြို့နယ်ကို ၂၀၂၄ ခုနှစ်၊ ဒီဇင်ဘာလ ၂၂ ရက်နေ့မှာ CDF – Mindat နဲ့ မဟာမိတ်တပ်ဖွဲ့တွေက သိမ်းပိုက်ခဲ့ပြီး မြို့နယ်အုပ်ချုပ်ရေးနဲ့ ပြည်သူ့ဝန်ဆောင်မှုလုပ်ငန်းတွေ ဆောင်ရွက်နေချိန် စစ်ကော်မရှင်က လေကြောင်းကနေ မကြာခဏ ဗုံးကြဲတိုက်ခိုက်လေ့ ရှိနေတာလည်းဖြစ်ပါတယ်။