အိန္ဒိယနိုင်ငံ၊ မီဇိုရမ်ပြည်နယ်၊ ကျန်ဖိုင်းခရိုင်၊ ဆိုင်းကမ်းဖိုင်းရွာမှာထောက်လှမ်းရေးသတင်းအရ အာသံရိုင်ဖယ်တပ်ဖွဲ့ဝင်တွေက စစ်ဆင်ရေးပြုလုပ်ခဲ့ရာ မြန်မာနယ်စပ်ဖက်ကို တင်ပို့မယ်လို့ ယူဆရတဲ့ လက်နက်ကြီး၊ လက်နက်ငယ်၊ ဖောက်ခွဲရေးပစ္စည်းနဲ့ စစ်သုံးပစ္စည်း အမြောက်အများနဲ့ အတူ လူတစ်ဦး ကို ဖမ်းဆီးရမိတယ်လို့ ဩဂုတ်လ (၃၁) ရက်နေ့မှာ India Today Media ကဖော်ပြပါတယ်။
ထောက်လှမ်းရေးအဖွဲ့အနေနဲ့ သတင်းအတိအကျရထားတဲ့အတွက် တပ်ဖွဲ့ဝင်တွေက သံသယရှိတဲ့အိမ်တစ်အိမ်ကို ဝိုင်းထားပြီး စစ်ဆေးရှာဖွေခဲ့ရာမှာ ၁၂-ဘို့ရိုင်ဖယ်တစ်လက်၊ ပစ္စတိုတစ်လက်၊ ခဲယမ်းတွေနဲ့ ဖောက်ခွဲရေးပစ္စည်းတွေကို တွေ့ရှိခဲ့တဲ့အတွက် အိမ်ပိုင်ရှင်ကို ဖမ်းဆီးခဲ့ပြီး ဘေးပတ်ဝန်းကျင်က တောအုပ်ထဲမှာ ဆက်လက်ရှာဖွေတဲ့အခါ ဝှက်ထားတဲ့ လက်နက်ပစ္စည်းတွေကို ထပ်မံတွေ့ရှိခဲ့ပါတယ်။
ဖမ်းဆီးရမိတဲ့ ပစ္စည်းတွေထဲမှာ Heckler & Koch G3 ချေမှုန်းရေးရိုင်ဖယ်တစ်လက်၊ Springfield စနိုက်ပါရိုင်ဖယ်နှစ်လက်၊ သေနတ်နှစ်လက်၊ MA ချေမှုန်းရေးရိုင်ဖယ်တစ်လက်၊ လက်ပစ်ဗုံးနှစ်လုံး၊ စနိုက်ပါကျည် ၇၅ တောင့်၊ .303 ထရစ်ဇာကျည် ၉၂ တောင့်၊ 5.56mm ကျည် ၉၁ တောင့်နဲ့ တခြားခဲယမ်းအမျိုးမျိုး ပါဝင်ပါတယ်။
ဖောက်ခွဲရေးပစ္စည်းတွေအနေနဲ့ Cordtex သုံးပုံး၊ IED ပြုလုပ်တဲ့ပစ္စည်းတွေ၊ ဆလင်ဒါပုံသဏ္ဌာန် ဖောက်ခွဲရေးပစ္စည်းတစ်ထုပ်နဲ့ PEK ခုနစ်ထုပ်တို့ကို သိမ်းဆည်းခဲ့ပါတယ်။ ဒီအပြင် မှန်ပြောင်းတွေ၊ ကျည်ကာအင်္ကျီတွေ၊ ကျည်ကာပြားနဲ့ ခါးပတ်လိုမျိုး စစ်သုံးပစ္စည်းတွေကိုလည်း ဖမ်းမိခဲ့ပါတယ်။
ဒီလိုဖမ်းဆီးရမိမှုကြောင့် ဒေသတွင်း လုံခြုံရေးအန္တရာယ်ဖြစ်နိုင်ချေကို ဟန့်တားနိုင်ခဲ့တယ်လို့ တာဝန်ရှိသူတွေက ပြောကြားခဲ့ပြီး ဖမ်းဆီးရမိတဲ့လူနဲ့ သိမ်းဆည်းရမိတဲ့ လက်နက်တွေကို စုံစမ်းစစ်ဆေးဖို့ ဒွန်းတလန်ရဲစခန်းကို လွှဲပြောင်းပေးလိုက်ပြီလို့ သိရပါတယ်။