မလေးရှားနိုင်ငံ ၊ ပါဟန်းပြည်နယ်၊ Bentong မြို့နယ်မှာ ပလက်၀ဇာတိအသက် ၃၅ နှစ်ခန့် ခူမီးချင်းအမျိုးသားတစ်ဦး သြဂုတ်လ ၂၄ ရက်နေ့က ရေနစ်သေဆုံးခဲ့ပြီး သေဆုံးသူ၏ နီးစပ်သူတွေ အနေနဲ့ ဒီကနေ့သြဂုတ်လ ၂၈ ရက်မှ သိရတယ်လို့ မလေးရှားနိုင်ငံရောက် ခူမီးချင်းအမျိုးသားတစ်ဦးကပြောပါတယ်။
မလေးရှားနိုင်ငံရောက် ခူမီးချင်းအမျိုးသားတစ်ဦးက “ သြဂုတ်လ ၂၄ ရက်နေ့ နေ့လည်အထိ သူ့မိတ်တွေနဲ့ ဖုန်းအဆက်သွယ်ရသေးမယ့် ညနေလောက်မှာ အဆက်သွယ်မရတော့လို့ အဲဒီနေ့မှာ သေဆုံးတာဖြစ်နိုင်တယ်လို့ ခန့်မှန်းတာပေါ့ သူအလုပ်လုပ်နေတာက ဒူးရင်းခြံမှာ အလုပ်လုပ်နေတာဖြစ်တယ် သူတို့ခြံသူဌေးက ရှာမတွေ့လို့ ရဲတွေနဲ့ ရှာပြီးမှ ဒူးရင်းခြံအနားက ချောင်းမှာ ရေနစ်သေဆုံးတဲ့ သူအလောင်းကိုတွေ့ကြတာပေါ့ နောက်ပြီး သူတို့စစ်ဆေးတွေ့ရှိချက်အရ သေဆုံးသူက ရေချိုးရင်း ဝက်ရူးပြန်ပြီး ရေနစ်သေဆုံး သွားတာလို့ပြောတယ် အခုထိ အလောင်းကိုတော့ ဆေးရုံမှာ ထားထားတယ် နောက်ပြီး လူမှုကူညီရေးဆောင်ရွက်သူတွေကို ဆက်သွယ်မှ ပလက်ဝဒေသခံမှန်း သိကြတာဖြစ်တယ်” လို့ပြောပါတယ်။
သေဆုံးသူ ခူမီးချင်းအမျိုးသားရဲ့အလောင်းကို မသဂြိုလ်ရသေးဘဲ ပါဟန်းပြည်နယ် Raub ဆေးရုံမှာ ရှိနေသေးတယ်လို့ သိပြီး သေဆုံးသူဟာ ချင်းပြည်နယ်တောင်ပိုင်း ၊ ပလက်ဝမြို့နယ်၊ ဒူးရီးတောင်ကျေးရွာက ဦးကြာထွန်းရဲ့သား အသက် ၃၄ နှစ်အရွယ် အိုက်ဆာထာဖြစ်တယ်လို့လည်း သိရပါတယ်။