မလေးရှားနိုင်ငံ ၊ ပါဟန်းပြည်နယ် စိုက်ပျိုးရေးခြံမှာ အလုပ်လုပ်ကိုင်နေကြတဲ့ ချင်းပြည်နယ်၊ပလက်၀မြို့နယ်ဇာတိ ခူမီးချင်းအမျိုးသား ၇ ဦးကို သင်းခွေချပ်ဖမ်းဆီးမှု၊ တောကောင်သတ်စားမှုတွေကြောင့် သစ်တောဌာနက အမူ ၄ မူဖြင့် တရားစွဲခဲ့ပြီး တရားရုံးက ထောင်ဒဏ် ၈ နှစ်နဲ့ ၄ လ အမိန့်ချခဲ့တယ်လို့ မလေးရှားနိုင်ငံရောက် ခူမီးအမျိုးသားတစ်ဦးကပြောပါတယ်။
မလေးရှား သစ်တောဌာနက ခူမီးချင်းအမျိုးသား ၇ ဦးကို သင်းခွေချပ်အခွံ ၄၇၇ ခု လက်ဝယ်တွေ့ရှိမှု၊ သားကောင်ဖမ်းရန်ကြိုးလက်ဝယ်တွေ့ရှိမှု၊ ကြံ့သူတော်အကောင် အရိုးတွေ့ရှိမှု၊ အသားခြောတွေ့ရှိမှုတွေနဲ့ တရားစွဲဆိုတာဖြစ်ပြီး ဒီကနေ့ သြဂုတ်လ ၂၉ ရက်နေ့မှာ တရားရုံးက ထောင်ဒဏ် ၈ နှစ်နဲ့ ၄ လ အမိန့်ချခဲ့တာဖြစ်တယ်လို့ မလေးရှားနိုင်ငံရောက် ခူမီးအမျိုးသားတစ်ဦးကပြောပါတယ်။
“ကျနော်တို့ချင်းတွေက သားကောင်တွေ ဖမ်းပြီးစားတက်ကြတော့ သူတို့ ၇ ဦးကို သစ်တော၊ လဝက ၊ ရဲတွေ စစ်ဆေးရေးဝင်တဲ့ချိန်မှာ သူတို့နေထိုင်တဲ့နေရာမှာ သင်းခွေချပ်တွေအများကြီးနဲ့ တောကောင် အသားခြောက်တွေ အရိုးတွေနဲ့ အတူတွေ့လို့ ဖမ်းဆီးခံရတာဖြစ်တယ် ဒီကနေ့မှ တရားရုံးက အမိန့်ချတာဖြစ်တယ် ဒီနိုင်ငံမှာ သားကောင်သတ်တာတွေက ပြစ်မှုအရမ်းကြီးတယ်” လို့ပြောပါတယ်။
ပလက်ဝမြို့နယ်ကနေ မလေးရှားနိုင်ငံမှာ အလုပ်လုပ်ကိုင်နေကြတဲ့ ခူမီးချင်းအမျိုးသား ၇ ဦးတို့ကို ၂၀၂၅ ခုနှစ် အစောပိုင်းလတွေတုန်းကစလို့ ဖမ်းဆီးခဲ့တာဖြစ်ပြီး ဒီကနေ့ သြဂုတ်လ ၂၉ ရက်နေ့မှာ တရားရုံးက အမိန့်ချတာဖြစ်ပါတယ်။
မလေးရှားနိုင်ငံသစ်တောဥပဒေပြဌာန်းချက်တွင် သင်းခွေချပ်တစ်ကောင်ဖမ်းဆီးပြစ်ဒဏ်သည် ထောင်ဒဏ် ၁၅ နှစ်အထိပေးနိုင်တယ်လို့ ပြဌန်းထားတာဖြစ်တယ်လို့လည်း သိရပါတယ်။
ဒါ့အပြင် ပါဟန်းပြည်နယ်မှာ နေထိုင်တဲ့ မင်းတပ်ချင်းအမျိုးသားတစ်ဦးကိုလည်း လက်လုပ် သေနက်ကိုင်ဆောင်မှုဖြင့် ဒီကနေ့မှာဘဲ တရားရုံးက ထောင်ဒဏ် ၁ နှစ်နဲ့ ခြောက်လ ချမှတ်ခဲ့တယ်လို့လည်း သိရပါတယ်။