“ရုံးမတက်နှင့် ရုန်းထွက်”
“အိမ်မှာနေပါ ဇိမ်နှင့်ဇိမ်နှင့်”
ကြားခဲ့ဖူးသောစကားလုံးများကအိမ်မက်ပမာ…
ပြည်သူတွေကကျွေးထားမယ် ဆိုသည့်စကားများကြောင့် CDM လုပ်ခဲ့ကြသည်မဟုတ်။ စစ်အာဏာရှင်ကိုမကြိုက်၍ ၊ စစ်အာဏာရှင်အောက်မှာ မနေလို၍ မိမိတို့ ခံယူချက်ဖြင့် ရာထူး လစာ အခွင့်အလမ်းများအားလုံးကို စွန့်လွှတ်ကာ အာဏာရှင်ဆန့်ကျင်ရေးလမ်းကြောင်းကိုလျှောက်ခဲ့ကြခြင်းဖြစ်သည်။ အများစုကခြောက်လ တစ်နှစ်ခန့်သာကြာမည်ဟု ထင်ခဲ့ကြသော်လည်း စစ်တပ်မှ ကြိုတင်ကြံစည်မှုနှင့် အာဏာသိမ်းခြင်းဖြစ်၍ လေးနှစ်ကျော်ကာလအတွင်းမပြုတ်ကျနိုင်သေးပါ။
ဤကာလအတွင်း CDM များ မည်ကဲ့သို့ ရှင်သန်ရပ်တည်ကြသနည်း။
တော်လှန်ရေး အစပိုင်းတွင် ဦးဆောင်ဦးမှုပြုခဲ့ကြသော CDM များအရေးကို ယခုတွင်မည်သူမျှဂရုမစိုက်၊စိတ်မဝင်စားကြတော့။ အချို့မှာပင်ပန်းခက်ခဲသော၊ မိမိတို့မကျွမ်းကျင်သော အသက်မွေးဝမ်းကြောင်းများကို ပြောင်း၍လုပ်ကိုင်ရသည်။ တစ်ချို့မှာ အလုပ်အကိုင်မရှိ မိဘဆွေမျိုးများအထောက်အပံ့ဖြင့် နေကြရသည်( အချို့မှာ မျက်နှာငယ်စွာဖြင့်)။ တစ်ချို့မှာ မိမိတို့ချစ်ရသောတိုင်းပြည်ကိုပင်စွန့်ခွာ၍ အသက်ရှင်ရပ်တည်နိုင်ရန်အလို့ငှာ တိုင်းခြားပြည်ခြားတွင် အလုပ်သမားဘဝ ရောက်ခဲ့ကြရသူတွေ ဒုနှင့်ဒေး။
ချင်းပြည်နယ်တွင်ကျန်ရှိနေသေးသော CDM ကျန်းမာရေးအင်အားစုများကလည်း တတ်နိုင်သည့် အင်အားဖြင့်ချင်းပြည်နယ် ကျန်းမာရေးပြိုလဲမသွားအောင် တောင့်ခံပြီးကြိုးစားပေးနေကြဆဲ။
ဤနေရာတွင် ထောက်ပြစရာတစ်ခုရှိလာသည်ဟုမြင်မိပါသည်။
တော်လှန်ရေးကာလကြာလာသည်နှင့်အမျှ ပြည်သူတွေလည်း ပန်းလာကြပြီ။ CDM အင်အားစုများလည်း တောင့်ခံနိုင်စွမ်း အနည်းနှင့်အများလျော့နည်းလာကြပြီ။အသက်အိုးအိမ်ပျက်စီးဆုံးရှုံးမှုများလည်းမနည်းကြတော့ပြီ။ တော်လှန်ရေးကြာရှည်ရခြင်း၏အကြောင်းရင်းကိုပြန်လည်သုံးသပ်ကြဖို့လိုလာပြီဟုယူဆမိပါသည်။
ပြည်သူများဘက်ကကော စစ်အာဏာရှင်ကို လုံးဝမကြိုက်၊ ဆန့်ကျင်ကြသည်ဆိုလျှင်တော်လှန်ရေးတွင် တစ်ဦးချင်းစီ ကမည်ရွှေ့မည်မျှပါဝင်ခဲ့ကြပြီလည်း?
အမှန်တကယ်ပါဝင်ထောက်ပံ့သူများစွာရှိသော်လည်း အတော်များများကယခုထိ ဝေလေလေဖြစ်နေကြသေးသည်။ Facebook ပေါ်တွင် မင်းအောင်လှိုင်နှင့် စစ်ခွေးများကို ဆဲဆိုသည့် comment ပေးလိုက်သည်ကိုပဲတော်လှန်ရေးလုပ်နေသည်ဟုထင်နေသူများလည်း ဒုနှင့်ဒေး။
တကယ်တမ်းမြေပြင်မှ ရဲဘော်များက ရံပုံငွေရှာသည့်အခါ လိုင်းပေါ်တွင် အာခြောက်အောင် Live လွှင့်ခါမှ သိန်း ၁၀၀၊၂၀၀ ခန့် ကို တစ်ပတ်လောက် မနည်းရှာနေကြရတာမျိုး၊ မဲလက်မှတ်ပြုလုပ်၍ တစ်စောင် ၅ ထောင်တစ်သောင်းလောက်ကို မနည်း အာခြောက်အောင်ပြောရောင်းနေရတာမျိုး။ တစ်ချို့တွေ ယခုလို မဲရောင်းရံပုံငွေရှာတော့လည်း မသိသလိုနေကြပြီး ဘီယာဆိုင် KTV ဆိုင်သွားကြလျှင် သိန်းဂဏန်းလောက်တော့ အမြည်းဖိုးအတွက်အသာလေးသုံးနေကြတာတွေ တွေ့နေရသည်။
တော်လှန်ရေးပြီးဖို့ဘယ်လောက်ကြာမှာလည်းလို့ မေးလည်းမေး ရံပုံငွေလည်းကိုယ်နှင့််နီးစပ်ရာ တော်လှန်ရေးအဖွဲ့များထံ ထည့်ဝင်ကြပါ။တော်လှန်ရေးအောင်မြင်ဖို့ ပိုမိုမြန်ဆန်လာပါလိမ့်မည်။
နောက်တစ်ခု CDM များယခုထိ ကြံ့ကြံ့ခံတော်လှန်နေကြသည်။ပြည်သူများကလည်းနိုင်ရာကဏ္ဍမှ ပါဝင်အားဖြည့်နေကြသည်။ တော်လှန်ရေးအဖွဲ့များကကော စကစကိုတကယ်တော်လှန်ရေးလုပ်နေကြပါ၏လော။ ဘုံရည်မှန်းချက် ဖြစ်သော စကစ ကင်းစင်ရေးကို မလုပ်ဘဲ မိမိတို့ နယ်မြေရရှိရေး၊ အာဏာထိုင်ခုံရရှိရေး၊ မိမိတို့မျိုးနွယ်စုကောင်းစားရေး၊ နိုင်ငံရေးတွင် အမြတ်ထုတ်ရေးနှင့်ခြေလှမ်းဦး၍ နေရာရယူရေးကိုသာ ဦးတည်နေကြ၏လောဆိုသည်ကို တော်လှန်ရေးတစ်ဖွဲ့စီမှ ယခုအချိန်ပြန်လည်သုံးသပ်ကြဖို့အချိန်တန်ပြီဟုယူဆပါသည်။
တော်လှန်ရေးကို တော်လှန်ရေးကဲ့သို့ အပီအပြင်လုပ်ဆောင်ရန်လိုအပ်သည်။
ထိုသို့မဟုတ်ဘဲ ရပ်တည်ချက်ခိုင်မာမှုမရှိဘဲ စကစကို အမှန်တကယ်တိုက်ရန် ရည်ရွယ်ချက်မရှိဘဲ စကစ နှင့် ညှိနှိုင်းရေးကိုသာ စောင့်/ ချောင်းမြောင်းနေသည်မျိုး သို့မဟုတ် ယခုကာလအခင်းအကျင်းတွင် နိုင်ငံရေးအသာစီးရလိုမှု၊ နေရာရလိုမှု နှင့်မိမိတို့ အဖွဲ့အခွင့်အရေးလောက်ကိုသာ ရယူလိုမှုများသာ ရည်ရွယ်နေကြသည်ဆိုလျှင် အဘယ့်ကြောင့်စကစကိုတော်လှန်သည်ဟု အမည်ခံနေကြမည်နည်း။ တစ်ချို့အဖွဲ့များနည်းတူ နယ်ခြားစောင့်တပ် ၊ သြဇာခံတပ်အဖြစ်သာ ပွင့်ပွင့်လင်းလင်းနေလိုက်ကြလျှင်ကောင်းမည်ဟုယူဆပါသည်။
ပြည်သူလူထု၏ အိမ်မက်များကို မလိမ်ညာကြပါနှင့်တော့၊ ပြည်သူလူထု၏ မျှော်ကိုးမှုများကို အလွဲသုံးစားလုပ်၍ မဖျက်ဆီးကြပါနှင့်တော့ဟုသာ ဆိုလိုက်ချင်ပါသည်။
CDM များအပါအဝင် တော်လှန်ရေးကို အားပေးထောက်ခံကြသည့် ပြည်သူလူထုများလည်း ဖွက်ဖွက်ကြေ၍ ပင်ပန်းနေကြပါပြီ။
တော်လှန်ရေးအဖွဲ့များကလည်း မလိုအပ်သေးသည့် အပိုင်းများတွင် ငွေအားများသုံးစွဲနေသည်များကိုလည်းလျှော့ချ၍ တော်လှန်ရေးကိုသာ အမြန်ပြီးမြောက်အောင်တစ်စိုက်မတ်မတ် အရေးပေးလုပ်ဆောင်ကြရန်တိုက်တွန်းပါသည်။
ကျွန်တော်တို့ CDM များ ယခုထိတောင့်ခံ၍ ဆက်လက်တိုက်ပွဲဝင်နေကြပါသေးသည်။
ပြည်သူလူထုများလည်း ကျရာ ကဏ္ဍမှာ တတ်အားသရွေ့ပါဝင်နေကြပါသေးသည်။ ဤအခိုက်အတန့်ကို အသုံးချ၍ တော်လှန်ရေးတပ်ဖွဲ့များ အမြန်ဆုံး စစ်အာဏာရှင်ကို အမြစ်ပြုတ်တိုက်ရန် အပြောနှင့်မဟုတ် အလုပ်နှင့်သက်သေပြကြရန်အကောင်းဆုံးအချိန်ဖြစ်ပါသည်။
စစ်ကောင်စီမှ ရုရှား တရုတ် အကူအညီအပြင် စစ်မှုထမ်းဥပဒေကိုအသက်သွင်း၍ စစ်မှုထမ်း ၈၀၀၀၀ ကျော် အင်အားစုဆောင်းပြီးဖြစ်ပါသည်။ စကစကို အချိန်ပေးပြီးစောင့်ကြည့်နေကြမလား? သိုမဟုတ်ဘဲ တစ်ပြိုင်နက်ထိုးစစ်ဆင်ကြမလား? သို့မဟုတ်ဘဲ စစ်တပ်နှင့် စေ့စပ်ဆွေးနွေးဖို့ပဲ ကြံစည်နေကြသလား၊ စကစကိုတကယ်တိုက်မှာလား၊ မိိမိတို့အကျိုးစီးပွားအတွက်ပဲ လုပ်မှာလား? တစ်လှိုင်းပြီးတစ်လှိုင်းဆိုတာတွေ တစ်ခုခုလာနေပြီဆိုတာတွေ အထွေထွေထိုးစစ်ဆိုတာတွေ ငှက်ကင်တွေ ဆိုတာတွေကကော ဘယ်နားရောက်နေပြီလည်း? ကစားမလား နားမလားပေါ့ ။ လားပေါင်းများစွာနှင့်မေးခွန်းထုတ်ရချင်းကလည်း တော်လှန်ရေးကို အမြန်အောင်စေချင်၍ဖြစ်ပါသည်။
စိတ်ရှည်ဖို့လိုတယ်လို့ဆိုလာလျှင်လည်း ၄ နှစ်ကျော်စိတ်ရှည်သည်းခံ ပင်ပန်းဆင်းရဲခံခဲ့ပြီးပြီမို့ ဘယ်လိုရည်ရွယ်ချက်ရှိသည်၊ဘယ်လိုအစီမံရှိသည်ကိုအမှန်တကယ်သိချင်မိပါသည်။ တော်လှန်ရေး မလုပ်ဘဲ စကစကိုတစ်ကယ်မတိုက်ဘဲ စေ့စပ်ရေးနှင့် မိမိတို့နေရာရရေးနှင့်ကောင်းစားရေးပဲလုပ်ကြမည်ဆိုရင်လည်း ဒဲ့ပြောကြရန်တိုက်တွန်းလိုပါသည်။
ကျွန်တော်တို့CDM သမားတွေလည်းအရမ်း ဦးနှောက်စားရန်မလိုေတာ့ ပါ။တစ်ချိန်လုံးရှောင်ပြေး၍တစ်သက်လုံး မိမိတို့နေရာပြန်မရရင်တောင် သာမန်ပြည်သူတွေများကဲ့သို့ပင် စိတ်သက်သက်သာသာနှင့် carrier များပြောင်းပြီး လွတ်လွတ်လပ်လပ် နေကြတော့ဖို့စဥ်းစားရနိုင်မည်။
ကိိုယ့်ပြည်သူတွေအတွက် စဥ်းစားကြလို့ risk အများကြီးကြားထဲက ပြည်သူလူထုဝန်ဆောင်မှုကိုဆက်ပေးနေကြရတာ။ ခေါင်းဆောင်ကြီးများက တော်လှန်ရေးတကယ်လုပ်နေတာမဟုတ်ရင်တော့ကျွန်တော်တို့လည်း အနေသာကြီးပေါ့။(တော်လှန်ရေးအမှန်တကယ် လုပ်ဆောင်နေသော ခေါင်းဆောင်ကြီးများနှင်အဖွဲ့များကိုမဆိုလိုပါ)။
CDM သမားတွေကို နောက်ပိုင်းလူရာတောင်မသွင်းချင်၊နေရာတောင်ပေးချင်ကြတာမှ မဟုတ်တော့တာ။ကိုယ်တွေဘက်ကလည်းစဥ်စားစရာလေးတွေရတာပေါ့။
သေချာတာကတော့ စကစ ထံအလုပ်ပြန်ဝင်ဖို့တော့မဟုတ်ပါ။ “ကိုယ့်ကိုတန်ဖိုးမထားကြသော၊ကိုယ်နှင့်ရည်မှန်းချက်မတူညီကြသောလူတစ်ဦးတစ်ယောက် သို့မဟုတ် အဖွဲ့အစည်းများနှင့်အလုပ်မလုပ်တော့ရန် နှင့်ထိုသို့သောအဖွဲ့အစည်းများအတွက် အလုပ်မလုပ်ကြရန်” ဟူ၍သာ အတွေးတစ်ချက်ဝင်လာခြင်းပါ။
မိိမိ ခံစားချက် အာဘော်သာဖြစ်ပါသည်။ လွတ်လပ်စွာအမြင်ကွဲလွဲနိုင်ပါသည်။
-•-
[ ချင်းတောင်ပေါ်မှ CDM ဆရာဝန် တဦး၏ ခံစားချက် အာဘော်သာဖြစ်သည်။ ]