သြဂုတ် ၂၆ ရက်က မှတ်ပုံတင်ခွင့်ပြုပြီးသောနိုင်ငံရေးပါတီ(၆၁)ပါတီနှင့်ပြည်ထောင်စုရွေးကောက်ပွဲကော်မရှင်(UEC)ဥက္ကဋ္ဌ ဦးသန်းစိုးတို့တွေ့ဆုံပွဲမှာ ချင်းပြည်သစ်ကွန်ဂရက်ပါတီ(NCC)ဥက္ကဋ္ဌအဖြစ် NLD ပါတီအစိုးရ ခေတ် ၂၀၁၈ ခုနှစ်က နေ ၂၀၂၀ ခုနှစ်အထိ ချင်းပြည်နယ်စည်ပင်၊စက်မှု၊လျှပ်စစ်ဝန်ကြီးအဖြစ်တာဝန်ထမ်း ဆောင်ခဲ့ကာ ၂၀၂၀ ရွေးကောက်ပွဲမှာ ချင်းပြည်နယ်၊ပလက်ဝမြို့နယ် ပြည်နယ်လွှတ်တော်ကိုယ်စားလှယ်အဖြစ် NLD ပါတီကိုယ်စားပြုပြီးအနိုင်ရခဲ့သူ ဦးစိုးထက်မှ အစည်းအဝေးတက်ရောက်ခဲ့ကြောင်း MRTV သတင်းထုတ်ပြန်ချက်အရသိရပါတယ်။
Chin World Media စုံစမ်းချက်အရ ချင်းပြည်သစ်ကွန်ဂရက်ပါတီ(NCC)ဥက္ကဋ္ဌအဖြစ်ဦးစိုးထက် ၊ အထွေထွေအတွင်းရေးမှုးအဖြစ် ၂၀၂၀ ရွေးကောက်ပွဲမှာ ချင်းပြည်နယ်၊ဖလမ်းမြို့နယ်မှာ ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီကိုယ်စားပြုပြီး ယှဉ်ပြိုင်ခဲ့သူ ဦးဘွာလ်ဆိုင်လိုမှ တာဝန်ယူထမ်းဆောင်နေကြောင်းသိရပါတယ်။
ချင်းပြည်သစ်ကွန်ဂရက်ပါတီ(NCC)ဥက္ကဋ္ဌ အသက် ၆၅ နှစ်ဝန်းကျင်ရှိသူ ဦးစိုးထက်ဟာ ပလက်ဝဇာတိဖြစ်ပြီး ဘွဲ့ရပြီး နောက် တပ်မ တော်မှာဝင် ရောက်ခဲ့ကာ ဒုဗိုလ်မှုးကြီးအဆင့်(တပ်ရင်းမှုး၊တပ်နယ်မှုး)တာဝန်အထိထမ်း ဆောင်ခဲ့သူဖြစ်ပါတယ်။ ဦးစိုးထက်ရဲ့ဖခင်ဟာ ပလက်ဝနယ်မှ ထင်ရှား ကျော်ကြားတဲ့ ချင်းလူထု လေးစားရတဲ့ သီရိပျံချီဦးထပ်လှိုင်းဖြစ်ပါတယ်။
ယာယီနေရပ်စွန့်ခွာသူများ ရောက်ရှိရာနေရပ်တွင် ထောက်ခံချက်ဖြင့်မဲပေးနိုင်ရန်စီစဉ်ထား ကြောင်း အာဏာသိမ်းစစ်ကော်မရှင်ခန့်ပြည်ထောင်စုရွေးကောက်ပွဲကော်မရှင်(UEC)ဥက္ကဋ္ဌ ဦးသန်းစိုးမှ သြဂုတ် ၂၆ ရက်က မှတ်ပုံတင်ခွင့်ပြုပြီးသောနိုင်ငံရေးပါတီ(၆၁)ပါတီနှင့်တွေ့ဆုံစဉ် ပြောကြားပါတယ်။
ယာယီနေရပ်စွန့်ခွာသူများနှင့် ပြည်တွင်း/ပြည်ပမှကြိုတင်မဲပေးမည့်သူများသည် ပုံစံ(၁၅)ဖြင့်တောင်းဆိုမဲပေးရမည်ဖြစ်ကာ ရောက်ရှိရာနေရပ်တွင် မဲပေးလိုပါက အနည်းဆုံးရက်ပေါင်း(၁၈၀) ထက်မနည်းနေထိုင်ပြီးပါက ထောက်ခံချက်ဖြင့် မဲပေးခွင့်ရရှိရန်ဆောင်ရွက်ထား ကြောင်းပြည်ထောင်စုရွေးကောက်ပွဲကော်မရှင်(UEC)ဥက္ကဋ္ဌ ဦးသန်းစိုးမှ ပြောကြားခဲ့ပါတယ်။
ပြည်ထောင်စုရွေးကောက်ပွဲကော်မရှင်(UEC)ဥက္ကဋ္ဌ ဦးသန်းစိုးနဲ့နိုင်ငံ ရေးပါတီများ တွေ့ဆုံပွဲမှာ ၂၀၂၅ ရွေး ကောက်ပွဲမှာ ချင်းပြည်နယ်မှာဝင်ရောက်ယှဉ်ပြိုင်မယ့် ပါတီ တွေဖြစ်တဲ့ခူမီးအမျိုးသားပါတီ (KNP)၊ ချင်းပြည်သစ်ကွန်ဂရက်ပါတီ (NCC) နှင့် ဇိုမီးအမျိုးသားပါတီ (ZNP) တို့တက်ရောက်ခဲ့ကြကြောင်းသိရပါတယ်။
၂၀၂၅ ခုနှစ် ဒီဇင်ဘာလ ၂၈ ရက်နေ့မှာ ကျင်းပမည့် အာဏာသိမ်းစစ် ကော်မရှင်ကဦးစီးပြီးကျင်းပမယ့် ပါတီစုံဒီမိုကရေစီအထွေထွေရွေးကောက်ပွဲ အပိုင်း (၁) မှာ ပါဝင်တဲ့ မြို့နယ် (၁၀၂) ခုမှာ ချင်းပြည်နယ်က ဟားခါး နှင့် တီးတိန်မြို့နယ်နဲ့စစ်ကိုင်းတိုင်းမှ ကလေးနဲ့တမူးမြို့နယ်များ ပါရှိကြောင်း စစ်ကောင်စီခန့်ပြည်ထောင်စုရွေးကောက်ပွဲကော်မရှင်ထုတ်ပြန်ချက်အရသိရပါတယ်။