ဇူလိုင်လ ၁၇ ရက်။
အိန္ဒိယနိုင်ငံ၊မီဇိုရမ်ပြည်နယ်မှာ ခိုလှုံလျက်ရှိတဲ့ မြန်မာဒုက္ခသည် များရဲ့ ဇီ၀ဆိုင်ရာ (biometric) နဲ့ လူဦးရေဆိုင်ရာ (demographic) အချက်အလက်ကောက်ယူရန်အတွက် ယခုဇူလိုင်လကုန်ပိုင်းမှာစတင်မှာဖြစ်ပြီး အိန္ဒိယ ဗဟိုအစိုးရက မီဇိုရမ်ပြည်နယ်အစိုးရ ကို အိန္ဒိယရူပီးငွေ ၃၈ သိန်း သတ်မှတ်ပေးထားခဲ့ပြီး လိုအပ်ပါက ရန်ပုံငွေထပ်မံ ထောက်ပံ့ပေးသွားမှာ ဖြစ်တယ်လို့ India Today မီဒီယာက ဖော်ပြပါတယ်။
ဒုက္ခသည်များရဲ့ စာရင်းပေးသွင်းခြင်းအတွက် Foreigner Identification Portal ကိုအသုံးပြုကာ အွန်လိုင်းနည်းစနစ်ဖြင့် ဆောင်ရွက်လျက်ရှိပြီး အဓိကအားဖြင့် အင်တာနက်ချိတ်ဆက်မှုကောင်းမွန်တဲ့ မြို့များနဲ့ ကျေးရွာများမှ ဦးစွာဆောင်ရွက်တယ်လို့ မီဇိုရမ်ပြည်နယ်၊ ပြည်ထဲရေးဝန်ကြီးဌာနက အကြီးတန်းအရာရှိတစ်ဦးက ပြောပါတယ်။
အဆိုပါဇီ၀ဆိုင်ရာ (biometric) နဲ့ လူဦးရေဆိုင်ရာ (demographic) အချက်အလက်စာရင်းကောက်ခံမှုမှာ ၂၀၂၁ ခုနှစ်နောက်ပိုင်း မီဇိုရမ်ပြည်နယ်အတွင်းရောက်ရှိလာတဲ့ လူဦးရေ ၃၅၀၀၀ ဝန်းကျင်ရှိတဲ့ မြန်မာစစ်ဘေးရှောင်များအားလုံး အကျုံးဝင်မှာဖြစ်တယ်လို့ပြောပါတယ်။
ဒုက္ခသည်အများအပြားသည် အင်တာနက်ချိတ်ဆက်မှုအားနည်းတဲ့ ဝေးလံခေါင်ပါးတဲ့ ဒေသများမှာနေထိုင်သူများရှိနေတာကြောင့် အင်တာနက် မလိုတဲ့ Offline mode စနစ်ကိုလည်း အသုံးပြုသွားမှာဖြစ်ပါတယ်။
စီမံချက်လုပ်ငန်းများကို ခရိုင်အုပ်ချုပ်ရေးမှုးများ ဦးဆောင်တဲ့ ခရိုင်အုပ်ချုပ်ရေးအဖွဲ့က ဦးစီးဆောင်ရွက်ပြီး လိုအပ်တဲ့ ပစ္စည်းကိရိယာများအားလုံးကို ပြည်နယ်အစိုးရအဖွဲ့က ထောက်ပံ့ပေးထားတယ်လို့ မီဇိုရမ်ပြည်နယ်၊ ပြည်ထဲရေးဝန်ကြီးက ပြောပါတယ်။
