ဇူလိုင်လ ၈ ရက်။
စစ်ကိုင်းတိုင်း၊ ကလေးမြို့နယ်တောင်ပိုင်းက တောတောင်တွေထဲ စစ်ဘေးတိမ်းရှောင်နေရတဲ့ ဒေသခံပြည်သူတွေမှာ အရေပြားရောဂါနဲ့ ရာသီတုပ်ကွေး အဖြစ်များနေကြပြီးလမ်းပန်းဆက်သွယ်ရေး ခက်ခဲကြောင့် ကျန်းမာရေးစောင့်ရှောက်မှုပိုင်း အခက်အခဲရှိသလို နဲ့ ဆေးဝါးပြတ်လပ်တာတွေကြောင့် လည်း အခက်ခဲတချို့ရှိနေတယ်လို့ စစ်ဘေးရှောင်တွေရဲ့ကျန်းမာရေးကိုကူညီနေတဲ့ People’s Healthcare Network (Kalay ) ကတာဝန်ရှိသူတစ်ဦးက ပြောပါတယ်။
People’s Healthcare Network (Kalay ) ကတာဝန်ရှိသူတစ်ဦးက “အရေပြားရောဂါနဲ့ ရာသီတုပ်ကွေးတွေ အဖြစ်များနေပါတယ် ကလေးမြို့နယ် တောင်ပိုင်းက ကျေးရွာတွေနဲ့ စစ်ရှောင်စခန်းတွေမှာ အဖြစ်များနေတယ် ကျန်းမာရေးစောင့်ရှောက်မှုအနေနဲ့ လမ်းပန်းဆက်သွယ်ရေး ခက်ခဲတာနဲ့ တချို့ ဆေးဝါးတွေ ပြတ်လပ်နေတာကြောင့် အခက်ခဲတချို့ရှိနေပါတယ် ရာသီတုပ်ကွေးကြောင့် သေဆုံးလူနာအထိတော့ ပြင်းထန်တာမျိုးမရှိသေးပါဘူး” လို့ပြောပါတယ်။
ကလေးတောင်ပိုင်းက အရှေ့စည်း၊ တင်သား၊ ဒိုးနွယ်၊ ကုက္ကိုလ် ၊ ရေရှင်၊ နွားရွာ၊ ကျော်ရွာ၊ ကြံသာ၊ ရှားဖို၊ အောင်ချမ်းသာ စတဲ့ ကျေးရွာတွေက စစ်ဘေးရှောင် ပြည်သူ အယောက် ၁၀၀ ကျော် နာမကျန်းဖြစ်နေတာလို့လည်း သိရပါတယ်။
၂၀၂၁ ခုနှစ် စစ်တပ်အာဏာသိမ်းပြီးနောက်ပိုင်း ဖြစ်ပွားခဲ့တဲ့ တိုက်ပွဲပဋိပက္ခတွေကြောင့် လေးနှစ်ကျော်အတွင်းမှာ ကလေးမြို့နယ်အတွင်းက ကျေးရွာ ၃၀ ကျော်ဟာ စစ်ကောင်စီရဲ့ မီးရှို့ဖျက်ဆီးတာခံခဲ့ရပြီး နေစရာမရှိတော့ဘဲ တောတောင်တွေထဲ ဖြစ်သလို နေထိုင်ရတဲ့ စစ်ဘေးဒုက္ခသည် ၃၀,၀၀၀ ကျော်ရှိတယ်လို့လည်း စစ်ဘေးရှောင်အရေး ကူညီပေးနေသူတွေ ပြောဆိုချက်အရ သိရပါတယ်။