ဧပြီလ ၂၁ ရက်။
စစ်ကောင်စီရဲ့ လက်နက်ထောက်ပံ့ပေးမှုတွေ ရရှိနေတာကြောင့် တွန်းဇံမြို့ကို Zomi Revolutionary Army (ZRA) အဖွဲ့က အချိန်မရွေးလာတိုက်ခိုက်နိုင် ကြောင်း ၊မနေ့ဧပြီလ ၂၀ ရက်နေ့ကလည်း ZRA အဖွဲ့ဟာ အင်အားအလုံးအရင်းနဲ့ တွန်းဇံမြို့ထဲဝင်ရောက်ပြီး CNF/A ပူးပေါင်းအဖွဲ့တွေကို လာရောက်တိုက်ခိုက်ခဲ့ပြီး ၊တိုက်ပွဲအတွင်း ZRA ဖက်ကလူထိခိုက်သေဆုံးမှုရှိခဲ့ကာ ZRA အဖွဲ့ဟာ ပြန်ဆုတ်သွားတယ်လို့ CNF/CNA နဲ့ CDF – KKG တို့ရဲ့ဒီကနေ့ ဧပြီလ ၂၁ ရက်နေ့မှာ ပြုလုပ်တဲ့ ပူးတွဲသတင်းစာရှင်းလင်းပွဲမှာ ချင်းအမျိုးသားတပ်ဦး(CNF/CNA )ရဲ့ပြောရေးဆိုခွင့်ရှိသူ ဆလိုင်းထက်နီက ပြောပါတယ်။
“ တိုက်ပွဲက တကျော့ပြန်တိုက်ပွဲလို့ ပြောလို့ရပါတယ် မနေ့က ၂၀ ရက်နေ့မှာ ZRA တွေက အင်အားအလုံးအရင်းနဲ့ တွန်းဇံမြို့ထဲကို တက်လာတာရှိတယ် အဲဒါကို သူတို့က ကျနော်တို့နေတဲ့နေရာအထိကို ပစ်ခတ်မှုလာလုပ်ပါတယ် ဒါပေမယ့်ကျနော်တို့က တုန့်ပြန်တယ် တုန့်ပြန်ပြီးတော့ မနက်ကတည်းက သူတို့အားလုံးနီးပါး တွန်းဇံမြို့ထဲကနေ ပြန်ဆုတ်ပါတယ် အဲဒီမှာ ကျနော်တို့သတင်းရတာကတော့ သူတို့ဘက်က ၄ ယောက်တော့ ကျသလို ၆ ယောက်က ဒဏ်ရာရတဲ့အနေထားပေါ့ သူတို့က တီးတိန်မြို့ဘက်ကို၎င်း ကျီခါးမြို့ဘက်ကိုလည်းကောင်း ပြန်ပြီးတော့ ဆုတ်သွားတယ်ပေါ၊မကြာသေးခင်ကဘဲ စစ်ကောင်စီရဲ့ပံ့ပိုးမှုနဲ့ ဒရုန်းသော်လည်းကောင်း လက်နက်သော်လည်းကောင်း ကျည်ဆန်သော်လည်းကောင်း အတွင်းသတင်းရရှိထားတာရှိပါတယ်၊သူတို့အနေနဲ့ အပြီးတိုင်ဆုတ်သွားတာမျိုးမဟုတ်ဘဲနဲ့ ပြန်လည်ပြီးတော့ တိုက်ပွဲက အချိန်မရွေး ရှိလာမဲ့ အနေထားဖြစ်လို့ အဲဒီအတွက် ကျနော်တို့လည်း အကောင်းဆုံး ပြင်ဆင်ထားပါတယ်” လို့ CNF/CNA ပြောရေးဆိုခွင့်ရှိသူ ဆလိုင်းထက်နီက ပြောပါတယ်။
ချင်းအမျိုးသားတပ်ဦး (CNF/A) ဦးဆောင်တဲ့ Chinland Council ပူးပေါင်းတပ်ဖွဲ့က ထိန်းချုပ်ထားတဲ့ တွန်းဇံမြို့နယ်အတွင်း ZRA နဲ့ Chinland Council ပူးပေါင်းတပ်ဖွဲ့အကြား ပြီးခဲ့တဲ့ ဒီဇင်ဘာလကုန်ပိုင်းကစပြီး လက်ရှိအချိန်အထိ တိုက်ပွဲတွေ မကြာခဏဖြစ်ပွားနေပါတယ်။