ဧပြီလ ၁ ရက်။
အင်တာနက်ကို ကန့်သတ်ပိတ်ဆို့ထားခြင်းကို စစ်ကောင်စီက ပြန်ဖွင့်ပေးဖို့နဲ့ ကပ်ဘေးကာလအတွင်း စစ်ကောင်စီက အင်တာနက်ဆက်လက်ပိတ်ထားမှုဟာ အကြပ်အတည်းကို ပိုမိုဆိုးရွား စေ ကြောင်း၊ နိုင်ငံတကာအကူအညီများထဲတွင် အမေရိကန်မှ Starlink ဆက်သွယ်ရေးစနစ်များလည်း ပါဝင်ရာ အများပြည်သူအကျိုးစီးပွားကို မျှော်ကိုးလျက် စစ်ကောင်စီအနေဖြင့် အလျင်အမြန် လက်ခံ အသုံးပြုသင့်တယ်လို့လွတ်လပ်သောမြန်မာသတင်းမီဒီယာကောင်စီ(IPCM) က ဒီကနေ့ ဧပြီလ ၁ ရက်နေ့မှာ ထုတ်ပြန်ပါတယ်။
နောက်ပြီး နိုင်ငံအတွင်း ငလျင်ဒဏ်ကြောင့် သက်ရောက်မှုများကို သတင်းရယူနိုင်ရေးအတွက် နိုင်ငံတကာ သတင်းထောက်များကိုလည်း စစ်ကောင်စီက ဗီဇာ အလွယ်တကူ ထုတ်ပေးရန်ကိုလည်း လွတ်လပ်သောမြန်မာသတင်းမီဒီယာကောင်စီ (IPCM) ကတောင်းဆိုထားပါတယ်။
လက်ရှိငလျင်ဒဏ်ကြောင့် အရေးပေါ်ကယ်ဆယ်ရေးကာလမှသည် ပြန်လည်ထူထောင်ရေး ကာလအထိ ရင်ဆိုင်ဖြေရှင်းရမှာဖြစ်လို့ ပြည်တွင်းပြည်ပက ကူညီကယ်ဆယ်ရေး ဝန်ထမ်းတွေသာမက သတင်းမီဒီယာသမားတွေမြေပြင်ကွင်းဆင်းပြီး လုံခြုံလွတ်လပ်စွာ သတင်းရယူပိုင်ခွင့်ပေးရန် အရေးကြီးတယ်လို့ လွတ်လပ်သောမြန်မာသတင်းမီဒီယာကောင်စီ (IPCM) က ဒီကနေ့ ဧပြီလ ၁ ရက်နေ့မှာ ထုတ်ပြန်ပါတယ်။
ပြီးခဲ့တဲ့ မတ်လ ၂၈ ရက်နေ့က လှုပ်ခတ်လိုက်သော ရစ်ခ်တာစကေး ၇.၇ ရှိသည့် အင်အားပြင်း ငလျင်ကြီးကြောင့် စစ်ကိုင်း၊ မန္တလေး၊ တံတားဦး၊ မြစ်သား၊ ပျော်ဘွယ်၊ နေပြည်တော်၊ ပျဉ်းမနား၊ တောင်ငူ စသည့်ဒေသများတွင် အကြီးအကျယ် ပျက်စီးဆုံးရှုံးမှုများရှိခဲ့ပြီး လမ်း၊ တံတားနှင့် ဘာသာရေးနေရာ အပါအဝင် အခြေခံအဆောက်အအုံများစွာ ပျက်စီးသွားခဲ့ပြီး လူသေကြေထိခိုက်မှုကိန်းများမှာ နေ့စဉ်မြင့်တက် လာနေတယ်လို့လည်း IPCM က ဆိုထားပါတယ်။
ဒီလိုမျိုးအခြေအနေမှာ မှန်ကန်တဲ့ သတင်း အချက်အလက်များကို ငလျင်ဒဏ်ခံပြည်သူများနှင့် ကူညီကယ်ဆယ်သူများက သိရှိရန်လိုပြီး အကူအညီများလိုအပ် သည့်သူများထံ ရောက်မရောက်၊ ပွင့်လင်းမြင်သာပြီး တာဝန်ခံမှုရှိမရှိ သတင်းမီဒီယာက ကူညီပံ့ပိုးနိုင်တယ်လို့ IPCM က ထုတ်ပြန်ထားပါတယ်။
၂၀၂၃ ခုနှစ်က မိုခါမုန်တိုင်းကြောင့် ထိခိုက်ပျက်စီးခဲ့ရတဲ့ ရခိုင်ပြည်နယ်သို့ သတင်းသွားယူစဉ် Myanmar Now ဓာတ်ပုံ သတင်းထောက် ကိုစိုင်းဇော်သိုက်ကို စစ်ကောင်စီက ဖမ်းဆီးကာ ထောင်ဒဏ် ၂၀ ချမှတ်ခဲ့ပြီး ဖမ်းဆီးခံသတင်းသမား ကိုစိုင်းဇော်သိုက်ကို အမြန်ဆုံးပြန်လည်လွှတ်ပေးဖို့ကိုလည်း IPCM ကတောင်းဆိုထားပါတယ်။
