အိန္ဒိယနိုင်ငံ၊ မီဇိုရမ်ပြည်နယ်၊ လောင်တလိုင်ခရိုင်၊ တွီဒန်းကျေးရွာမှာရှိတဲ့ ချင်းပြည်နယ် ပလက်ဝကမြို့နယ်က စစ်ဘေးရှောင်ပြည်သူတွေကို တွီဒန်းကျေးရွာအာဏာပိုင်တွေက နယ်မြေတွေသတ်မှတ်ပေးပြီး နေအိမ်တွေ ဆောက်လုပ်ခွင့်ပေးတယ်လို့ ပလက်ဝကောင်စီရဲ့ လူမှုကယ်ဆယ်ရေးဌာန တာဝန်ခံကပြောပါတယ်။
ပလက်ဝကောင်စီရဲ့ လူမှုကယ်ဆယ်ရေးဌာန တာဝန်ခံက “တီဒန်းကျေးရွာရဲ့ အာဏာပိုင်တွေအနေနဲ့ စစ်ရှောင်တွေရဲ့ဒုက္ခရောက်နေတဲ့ပေါ်မှာ ခြေခံပြီးမှ သူတို့ရဲ့ကျေးရွာရဲ့ အာဏာပိုင်တွေကနေမှ နေရာထိုင်ခင်းပေးတဲ့သဘောပါ အစိုးရက အစီအမံနဲ့ ချပေးတဲ့ သဘောမဟုတ်ဘူး။ ဒီလိုကျေးရွာအာဏာပိုင်တွေ လက်ခံပေးတဲ့ပေါ်မှာ သူတို့သတ်မှတ်ပေးတဲ့နေရာမှာသာ အိမ်ဆောက်ရတဲ့သဘောထားပေါ့ နောက်ပြီး ကိုယ့်အစီအစဉ် ကိုယ်ထူကိုယ်ထနဲ့ဘဲ ကိုယ့်အိမ်ကိုယ့်ယာကို တည်ဆောက်ရတဲ့ အနေထားဖြစ်ပါတယ်” လို့ပြောပါတယ်။
မီဇိုရမ်ပြည်နယ်၊ လောင်တလိုင်ခရိုင်၊ တွီဒန်းကျေးရွာမှာ ချင်းပြည်နယ်၊ ပလက်ဝမြို့နယ်ကနေ စစ်ဘေးရှောင်လာတဲ့ အိမ်ထောင်စုက ၂၇၃ စုရှိပြီး အမျိုးသား ၅၈၆ ဦး၊ အမျိုးသမီး ၆၇၄ ဦး စုစုပေါင်း ၁၂၆၀ ဦး ရောက်ရှိနေထိုင်နေတယ်လို့လည်း သိရပါတယ်။ ပလက်ဝမြို့နယ်က ဒေသခံပြည်သူတွေဟာ စစ်ကောင်စီအာဏာသိမ်းပြီးနောက်ပိုင်း ဖြစ်ပွားတဲ့ တိုက်ပွဲတွေ နဲ့ အာရက္ခတပ်တော် ( AA) အုပ်ချုပ်မှုအောက်မှာ နေထိုင်ဖို့ အဆင်မပြေတဲ့သူတွေဟာ အိန္ဒိယနိုင်ငံ၊ မီဇိုရမ်ပြည်ဘက်ကို ရွှေ့ပြောင်းနေကြ ရတယ်လို့လည်း သိရပါတယ်။
