ဖေဖော်ဝါရီလ ၁၂ ရက်။
တိုက်ပွဲဖြစ်ပွါးခဲ့တဲ့မကွေးတိုင်း၊ ငဖဲမြို့နယ် ပဒါန်းမြို့အနောက်ဘက် ဘုရာတောင်စခန်းကုန်းအနီးက ဂုတ်ဝ နဲ့ ရေနွယ်အရှိုချင်းရွာတွေက ဒေသခံ အရှိုချင်းလူမျိုး၁၆ ဦးခန့်ဝန်းကျင်ကို စစ်ကောင်စီက ဖေဖော်ဝါရီလ ၁၁ ရက်နေ့က ဖမ်းဆီးသွားတယ်လို့ Chin Defence Force – Asho တပ်ဖွဲ့ကပြောရေးဆိုခွင့်ရှိသူက ပြောပါတယ်။
ပြီးခဲ့တဲ့ဖေဖော်ဝါရီလ ၉ ရက်နေ့ နေ့လည်က ငဖဲမြို့နယ် ပဒါန်းမြို့အနောက်ဘက် ပျဉ်းဝစစ်ဆေးရေးဂိတ်အနီးရှိ ဘုရားတောင်မှာ တပ်စွဲထားတဲ့ စစ်ကောင်စီစခန်းကုန်းကို CDF – Asho ကဝင်ရောက်တိုက်ခိုက်ခဲ့ပြီး စစ်ကောင်စီဘက်က ပဒါန်းမြို့အနီး စစ်စခန်းတွေဘက်ကို ပြန်ထွက်ပြေးသွားခဲ့ကြကာ တိုက်ပွဲအပြီး နောက်တစ်ရက်မှာ ဘုရားတောင်စခန်းကုန်းအနီးက ဂုတ်ဝ နဲ့ ရေနွယ်အရှိုချင်းရွာတွေက ဒေသခံ ၁၆ ဦးခန့်ဝန်းကျင်ကို စစ်ကောင်စီက ဖမ်းဆီးခဲ့တာလို့ သိရပါတယ်။
CDF – Asho ပြောရေးဆိုခွင့်ရှိသူက “40 mm ပစ်ခတ်ပြီးတာနဲ့ အကုန်ထွက်ပြေးသွားတယ် ကျနော်တို့စခန်းထဲရောက်တော့ စစ်ကောင်စီ တပ်သားတွေမရှိတော့ဘူး သူတို့နေတဲ့ အဆောင်တွေ ဆိုင်ကယ်တွေတော့ မီးရှို့ဖျက်စီးခဲ့ပါတယ်။ ဒေသခံ အရှိုချင်း ၁၆ ဦးခန့်ရှိမယ် ဖမ်းဆီးသွားတယ်” လို့ပြောပါတယ်။
ပျဉ်းဝစစ်ဆေးရေးဂိတ်အနီးရှိ ဘုရားတောင်မှာ တပ်စွဲထားတဲ့ စစ်ကောင်စီ စခန်းကုန်းကို Chin Defence Force – Asho ဘက်က အနီးကပ်နေရာယူ တိုက်ခိုက်စဉ် ရန်သူဘက်က အနည်းငယ် ပြန်လည်ပစ်ခတ်မှုလောက်သာ တုံ့ပြန်ပြီး စခန်းစွန့်ခွာ ထွက်ပြေးသွားကြတယ်လို့ Chin Defence Force – Asho က ဖေဖော်ဝါရီလ ၁၁ ရက်နေ့ကလည်း ထုတ်ပြန်ထားပါတယ်။
ဘုရားတောင်စခန်းကုန်းပေါ် စစ်ကောင်စီ တပ်သားတွေ နေထိုင်ခဲ့သော အဆောင်တွေကို မီးရှို့ဖျက်ဆီးခဲ့သလို ပျဉ်းဝစစ်ဆေးရေးဂိတ်ရှိ စစ်ကောင်စီတပ်သားအားလုံးသည်လည်း ပဒါန်းမြို့အနီး စစ်ကောင်စီ တပ်စခန်းတွေဘက်ကို အသီးသီးထွက်ပြေးသွားခဲ့ကြတယ်လို့လည်း ထုတ်ပြန်ထားပါတယ်။
