ဇန်နဝါရီလ ၁၃ ရက်။
မြန်မာ – အိန္ဒိယနိုင်ငံနယ်စပ်၊ စစ်ကိုင်းတိုင်း၊ တမူးမြို့မှာ မြို့သိမ်းတိုက်ပွဲဖြစ်လာမယ်ဆိုတဲ့ သတင်းတွေကြောင့် တမူးမြို့ကဒေသခံ ပြည်သူထောင်ချီဟာ ယခုရက်ပိုင်းအတွင်း မြို့ကို စွန့်ခွာထွက်ပြေးတိမ်းရှောင်နေကြတယ်လို့ သိရပါတယ်။
တမူးဒေသခံတစ်ဦးက “မြို့သိမ်းတိုက်ပွဲတွေဖြစ်လာတော့မယ်ဆိုတဲ့ သတင်းတွေကြောင့် အားလုံးနီးပါးလိုလို အဆင်ပြေမယ့် အရပ်ဒေသတွေကို ထွက်ပြေးတိမ်းရှောင်နေကြတယ် တချို့က အိန္ဒိယနိုင်ငံဘက်ကို ထွက်ပြေးကြတာရှိသလို တချို့က ကလေးမြို့ဘက်စတဲ့ နေရာတွေကို ထွက်ပြေးတိမ်းရှောင်နေကြတယ်လို့ သိရတယ်” လို့ပြောပါတယ်။
အိန္ဒိယနိုင်ငံနဲ့ တစ်မိုင်ဝန်းကျင်သာဝေးကွာတဲ့ တမူးမြို့မှာ စစ်ကောင်စီတပ်နဲ့ ပျူစောထီးတွေက စိုးမိုးထားပြီး တိုက်ပွဲဖြစ်လာမယ်ဆိုတဲ့ သတင်းတွေကြောင့် ဒေသခံတွေဟာ ကားကြီး၊ ကားငယ်၊ ဆိုင်ကယ်တွေနဲ့ပါ နေ့စဉ် ထွက်လာကြတယ်လို့လည်း သိရပါတယ်။
နေ့စဉ် တမူးမြို့ကို စွန့်ခွာထွက်လာကြတဲ့သူတွေကို စစ်ကောင်စီတပ်ဘက်ကရော၊ တော်လှန်ရေးတပ်ဘက်ကရော ဂိတ်တွေကို ဖွင့်ပေးထားတယ်လို့လည်း သိရပြီး စွန့်ခွာလာသူတွေဟာ အိန္ဒိံယနိုင်ငံဘက်ခြမ်းကို ထွက်ပြေးတိမ်းရှောင်နေကြတာ ရှိသလို တချို့က ကလေးမြို့ဘက်ကို ထွက်ပြေးတိမ်းရှောင်နေကြတာတွေလည်း ရှိတယ်လို့ သိရပါတယ်။
လက်ရှိတမူးမြို့မှာ ဆက်သွယ်ရေး ဖုန်းလိုင်း၊ အင်တာနက်လိုင်းတွေ ပြတ်တောက်နေတာတွေကြောင့်လည်း ဒေသခံတွေဟာ စိုးရိမ်စိတ်ပိုဖြစ်နေကြပြီး တော်လှန်ရေးအင်အားစုဘက်ကတော့ တမူးမြို့သိမ်းတိုက်ပွဲအတွက် တစ်စုံတစ်ရာ သတင်းထုတ်ပြန်ထားတာမျိုးတော့ မရှိသေးပါဘူး။