အောက်တိုဘာလ ၈ ရက်။
တီးတိန်မြို့နယ်မှာ People Defence Army (PDA) အဖွဲ့က တီးတိန်မြို့နယ်ပြည်သူ့အုပ်ချုပ်ရေးကောင်စီ ဖွဲ့စည်းတာဟာ တရားဝင်မှုမရှိကြောင်းနဲ့ ပြည်သူလူထုကလည်း လုံးဝ လက်မခံကြောင်း ZFU/PDF – Zoland အဖွဲ့က အောက်တိုဘာလ ၇ ရက်နေ့မှာ ထုတ်ပြန်ထားပါတယ်။
တီးတိန်မြို့နယ် ပြည်သူ့အုပ်ချုပ်ရေးအဖွဲ့နဲ့ တွန်းဇံမြို့နယ်ပြည်သူ့အုပ်ချုပ်ရေးအဖွဲ့ တို့ကို ၂၀၂၁ ခုနှစ် မတ်လ (၁) ရက်နေ့မှာ ပြည်ထောင်စုလွှတ်တော် ကိုယ်စားပြုကော်မတီ (CRPH) ၏ ညွှန်ကြားချက်အရ စတင်ဖွဲ့ခဲ့ပြီး ကြားကာလ ချင်းအမျိုးသားအတိုင်ပင်ခံကောင်စီ (ICNCC) မြို့နယ်နယ်ပြည်သူလူထုနဲ့ အတူလက်တွဲကာ ယနေ့ချိန်ထိ ပြည်သူ့အုပ်ချုပ်ရေးကို တစိုက်မတ်မတ် ဖော်ဆောင်လျက်ရှိတာကြောင့် People Defence Army (PDA)ရဲ့ ကြေညာချက်ဟာ ချင်းပြည်နယ်တစ်ခုလုံးကို စိုးမိုးခြယ်လှယ်လိုတဲ့ CNF/A ရဲ့ ညစ်ပတ်တဲ့ နိုင်ငံရေးကစားကွက်တစ်ခုဖြစ်ပြီး တရားဝင်မှုမရှိဘူးလို့ ZFU/PDF – Zoland က ထုတ်ပြန်ထားပါတယ်။
တီးတိန်မြို့နယ်အတွင်း ပြည်သူ့အုပ်ချုပ်ရေးယန္တရား ထိရောက်စွာ အကောင်အထည်ဖော်ဆောင်ရွက်နိုင်ရန် ပြည်သူ့ကာကွယ်ရေးတပ်ဖွဲ့ (တီးတိန်) PDA – Tedim ၏ ပြည်သူ့အုပ်ချုပ်ရေးဆိုင်ရာအဖွဲ့ဖြစ်တဲ့ တီးတိန်မြို့နယ်ပြည်သူ့အုပ်ချုပ်ရေးကောင်စီ ကို အောက်တိုဘာလ ၇ ရက်နေ့မှာ စတင်ပြီးဖွဲ့စည်းကြောင်း ထုတ်ပြန်ခဲ့ပါတယ်။
ZFU/PDF-Zoland အဖွဲ့ဟာ ချင်းလက်နက်ကိုင် ၆ ဖွဲ့စုစည်းထားတဲ့ ချင်းညီနောင်အဖွဲ့ဝင်ဖြစ်ပါတယ်။