အောက်တိုဘာလ ၇ ရက်။
ချင်းပြည်နယ်က မြို့နယ်အများစုမှာ ဆက်သွယ်ရေးဖုန်းလိုင်းဖြတ်တောက်ထားလို့ စစ်ဘေးရှောင်တွေအကူအညီတောင်းဖို့အတွက်ကို အခက်အခဲများစွာကြုံနေရကြောင်း စစ်ဘေးရှောင်အရေး ကူညီဆောင်ရွက်ပေးနေသူတွေဆီကသိရပါတယ်။
ကန်ပက်လက်ကစစ်ဘေးရှောင်တွေကိုကူညီပေးသူတစ်ဦးပြောတာက “ဖုန်းလိုင်းဆက်သွယ်ရေး၊ လမ်းပန်းဆက်သွယ်ရေးတွေဖြတ်ထားတော့ ကျန်းမာရေးကိစ္စတွေအတွက် အရမ်းကို အခက်ခဲဖြစ်တယ် လမ်းခရီးကြောင့် အချိန်ပိုကြာ လမ်းကြမ်းတော့ လမ်းခရီးမှာတင် သေတဲ့ ကိုယ်ဝန်ဆောင်တွေ နာမကျန်းတွေ ရှိတယ်။ ကုန်သွယ်ရေးဖြတ်ထားတော့ ဒေသခံပြည်သူတွေက အခြေခံလိုအပ်ချက်တွေကို ဈေးနှုန်းအဆမတန်ပေးပြီး ဝယ်နေရတယ်။ ကုန်ပစ္စည်းတွေကန့်သက်တော့ လိုအပ်တာတွေ ဝယ်ယူခွင့်မရတာတွေဖြစ်တယ်” လို့ပြောပါတယ်။
ဆက်သွယ်ရေးဖုန်းလိုင်းတွေနဲ့လမ်းပန်းဆက်သွယ်ရေးတွေကို စစ်ကောင်စီဘက်က ဖြတ်တောက်ထားတာဟာ တော်လှန်ရေးအင်အားစုတွေကို အခက်အခဲဖြစ်စေချင်တဲ့ ရည်ရွယ်ချက်နဲ့ လုပ်ပေမယ့် တော်လှန်ရေးအင်အားစုတွေဘက်မှာ ဆက်သွယ်ရေးနဲ့လမ်းပန်းဆက်သွယ်ရေးအတွက် သူတို့နည်း သူတို့ဟန်နဲ့ ရှိပြီးသားဖြစ်တာကြောင့် ဒေသခံစစ်ဘေးရှောင်ပြည်သူတွေသာ အဓိကခံနေရတာလို့ ဒေသခံတွေကပြောပါတယ်။
ဒေသခံတစ်ဦးက “ကုန်ပစ္စည်းဖြစ်စေ ဆက်သွယ်ရေးဖြစ်စေ တော်လှန်ရေးအင်အားစုတွေ အသုံးပြုတဲ့ နည်းလမ်းတွေ၊ လမ်းကြောင်းတွေက သူတို့အချင်းချင်းကြားမှာရှိပြီးသား အဓိက အဲဒီအခက်ခဲတွေ အကျိုးသက်ရောက်မှု ခံရတာက မိဘပြည်သူတွေပဲခံနေရတယ်” လို့ပြောပါတယ်။
ချင်းပြည်နယ်တောင်ပိုင်းနဲ့ မကွေးတိုင်းဆောမြို့နယ်တွေမှာ စစ်ကောင်စီက MPT နဲ့ တယ်လီနောဖုန်းလိုင်းတွေ ဖြတ်တောက်ထားတဲ့အပြင်လမ်းပန်းဆက်သွယ်ရေးတွေကိုလည်း ပိတ်ဆို့ထားတယ်လို့ ဒေသခံတွေဆီကနေ သိရပါတယ်။
အသံ – Athan အဖွဲ့ရဲ့ သြဂုတ်လ ၁၄ ရက်နေ့က ထုတ်ပြန်တဲ့ အစီရင်ခံစာအရ မြန်မာနိုင်ငံတဝန်း ဖုန်းလိုင်းနဲ့ အင်တာနက်ဖြတ်တောက်ခံရတဲ့ မြို့နယ်ပေါင်း ၉၂ မြို့နယ်ထဲမှာ ချင်းပြည်နယ်က ၉ မြို့နယ်ထဲမှာ ကန်ပက်လက်၊ မင်းတပ်၊ မတူပီ၊ ပလက်ဝ၊ တီးတိန်၊ ထန်တလန်၊ တွန်းဇံ၊ ဖလမ်း စတဲ့မြို့နယ်တွေ ပါဝင်ပါတယ်။