စက်တင်ဘာလ ၂၆ ရက်။
PDF နဲ့တိုင်းရင်းသားလက်နက်ကိုင်အဖွဲ့တွေကို နိုင်ငံရေးပြဿနာကို နိုင်ငံရေးနည်းလမ်းနဲ့ ဖြေရှင်းနိုင်ရေး ဆက်သွယ်ဆောင်ရွက်နိုင်တယ်လို့ ကမ်းလှမ်းဖိတ်ခေါ်တဲ့အကြောင်း အာဏာသိမ်း စစ်ကောင်စီက ဒီကနေ့ စက်တင်ဘာလ ၂၆ ရက်မှာ သတင်းထုတ်ပြန်ပါတယ်။
လက်နက်ကိုင်လမ်းစဉ်ကြောင့်နိုင်ငံတော်မှာ ဖြစ်ပေါ်ခဲ့ရတဲ့ ဆုံးရှုံးနစ်နာမှုတွေကို ထောက်ရှုပြီး ထာဝရငြိမ်းချမ်းရေးနဲ့ ဖွံ့ဖြိုးတိုးတက်ရေးကို ပြည်သူတွေနဲ့အတူ လက်တွဲ ဖော်ဆောင်ရွက်နိုင်ရန် လက်နက်ကိုင်လမ်းစဉ်ကို စွန့်လွှတ်ပြီး ပါတီနိုင်ငံရေးလမ်းကြောင်းနဲ့သော်လည်းကောင်း၊ ရွေးကောက်ပွဲလမ်းကြောင်းနဲ့သော်လည်းကောင်း နိုင်ငံရေးပြဿနာကို နိုင်ငံရေးနည်းလမ်းနဲ့ ဖြေရှင်းနိုင်ရေး ဆက်သွယ်ဆောင်ရွက်နိုင်ပါရန် ကမ်းလှမ်းဖိတ်ခေါ်တယ်လို့ စစ်ကောင်စီက ထုတ်ပြန်ပါတယ်။
၂၀၂၀ မှာကျင်းပခဲ့တဲ့ ရွေးကောက်ပွဲမှာ မဲမသမာမှုဖြစ်ခဲ့လို့ နိုင်ငံတော်အာဏာအရပ်ရပ်ကို ၂၀၀၈ ခုနှစ် ဖွဲ့စည်းပုံအခြေခံဥပဒေနဲ့အညီ လွှဲပြောင်းရယူ ထိန်းသိမ်းခဲ့တယ်လို့လည်း စစ်ကောင်စီက ထုတ်ပြန်ထားပါတယ်။
ကျင်းပဖို့ရှိတဲ့ ပါတီစုံဒီမိုကရေစီအထွေထွေရွေးကောက်ပွဲအတွက် မဲစာရင်းမှန်ကန်မှုကို အထောက်အကူပြုစေမယ့် သန်းခေါင်စာရင်းကောက်ယူတာတွေကို အောက်တိုဘာလ (၁) ရက်နေ့ စတင်ကောက်တော့မယ့်အကြောင်းနဲ့ ရွေးကောက်ပွဲအတွက် ကြိုတင်ပြင်ဆင်မှုတွေကို အားသွန်ခွန်စိုက် ဆောင်ရွက်နေချိန်ဖြစ်တယ်လို့ စစ်ကောင်စီက ဆိုပါတယ်။
ချင်းပြည်နယ်မြို့တော်ဟားခါးမြို့မှာတော့ စစ်ကောင်စီလုပ်ငန်းယန္တရားလည်ပတ်နိုင်အောင် သန်းခေါင်စာရင်းကောက်ယူတဲ့နေရာမှာ ကူညီပေးနေတဲ့ Non – CDM ဝန်ထမ်းတွေကို စစ်ကောင်စီလိုသဘောထားပြီး တွေ့တဲ့နေရာမှာ ပစ်ခတ်သွားမယ်လို့ Chinland Defense Force – Hakha က စက်တင်ဘာလ ၂၃ ရက်နေ့မှာ ထုတ်ပြန်အသိပေးထားပါတယ်။
