Input your search keywords and press Enter.

CNLD ပါတီမှ ချင်းတိုင်းရင်းသားရေးရာဝန်ကြီး ယှဉ်ပြိုင်မည့်သူများကို ဇူလိုင် ၂၅ တွင် အတည်ပြုမည်

 

 

Salai C Lian

ချင်းအမျိုးသားဒီမိုကရေစီအဖွဲ့ချုပ် ( CNLD) ပါတီမှ ချင်းတိုင်းရင်းသားရေးရာ ဝန်ကြီးနေရာများတွင် ယှဉ်ပြိုင်မည့်လူစာရင်းကို ဇူလိုင်လ ၂၅ ရက်နေ့တွင် ပါတီဗဟိုမှ ဆုံးဖြတ်သွားမည်ဖြစ်ကြောင်း ပါတီ၏ ပူးတွဲဥက္ကဌ ဖြစ်သူ ပူးနိုထန်ကပ်က ပြောသည်။

ပူးနိူးထန်ကပ်က “အခုကတော့ မြို့နယ်အဆင့်နဲ့ ရွေးတာဖြစ်တယ်၊ ဆိုတော့ အတည်မဖြစ်သေးဘူး၊ ကျွန်တော်တို့ ဗဟိုပါတီကပဲ ဆုံးဖြတ်ပေးမယ်၊ လောလောဆယ်မှာတော့ ဘယ်သူက ချင်းရေးရာဝန်ကြီးနေရာပါမလဲဆိုတာတော့ ပြောလို့မရသေးဘူး” ဟုပြောသည်။

ချင်းရေးရာဝန်ကြီး ရွေးချယ်မှုနှင့်ပတ်သက်ပြီး ချင်းဝေါလ်မီဒီယာ၏ မေးမြန်းမှုအပေါ် ယခုကဲ့သို့ ပါတီ၏ ပူးတွဲဥက္ကဌ ဖြစ်သူ ပူးနိုထန်ကပ်က ပြောဆိုခြင်းဖြစ်သည်။
ချင်းအမျိုးသားဒီမိုကရေစီအဖွဲ့ချုပ်အနေဖြင့် ၂၀၂၀ ရွေးကောက်ပွဲတွင် ချင်းပြည်နယ်အတွင်း နေရာအပြည့်ဝင်ပြိုင်မည်ဖြစ်ပြီး ချင်းတိုင်းရင်းသားရေးရာဝန်ကြီးနေရာများတွင်လည်း အပြည့်ဝင်ပြိုင်သွားမည်ဖြစ်ကြောင်း သိရသည်။

ချင်းအမျိုးသားဒီမိုကရေစီအဖွဲ့ချုပ်အနေဖြင့် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ရခိုင်ပြည်နယ်များတွင် ချင်းတိုင်းရင်းသားရေးရာဝန်ကြီး နေရာအပြည့်ဝင်ရောက်ယှဉ်ပြိုင်မည်ဖြစ်ကြောင်း လက်ရှိပါတီဥက္ကဌဖြစ်သူ ပူးငိုင်ဆာ့ခ်မှ အတည်ပြုပြောဆိုထားသည်။

ချင်းအမျိုးသားဒီမိုကရေစီအဖွဲ့ချုပ်သည် ချင်းအမျိုးသားဒီမိုကရက်တစ်ပါတီ၊ ချင်းတိုးတက်ရေးပါတီနှင့် ချင်းဒီမိုကရေစီအဖွဲ့ချုပ်ပါတီတို့ ၂၀၁၈ ခုနှစ််တွင်ပူးပေါင်းပြီး တစ်ပါတီအဖြစ် တည်ထောင်ထားခြင်းဖြစ်သည်။