Input your search keywords and press Enter.

အိန္ဒိယနိုင်ငံမှ ပြန်လာမည့် ချင်းလူမျိုးများ Quarantine Center အခက်အခဲကြောင့် တိုက်ရိုက်လက်မခံဟုဆို

 

 

Salai C Lian

ကမ္ဘာ့ကပ်ရောဂါ ကိုရိုနာဗိုင်းရပ်စ်ကြောင့် ပိတ်မိနေသည့် အိန္ဒိယနိုင်ငံမှ ပြန်လာမည့် ချင်းလူမျိုးများကို စစ်ကိုင်းတိုင်းဒေသကြီးအတွင်းမှ တိုက်ရိုက်လက်မခံခြင်းသည် Quarantine Center များတွင်ထားရှိရန် အခက်အခဲများစွာရှိသည့်အတွက် ဖြစ်ကြောင်း စစ်ကိုင်းတိုင်းဒေသကြီး ချင်းတိုင်းရင်းသားရေးရာဝန်ကြီး ဦးလာလ်ထောင်းထန်က ပြောသည်။

ချင်းတိုင်းရင်းသားရေးရာဝန်ကြီး ဦးလာလ်ထောင်းထန်က “နိုင်ငံအခြေအနေ ပြောရရင်တော့ ထိုင်းကပြန်လာတဲ့သူဆိုရင် မြဝတီမှာထားကြတယ်၊ တကယ်တမ်းတော့ အိန္ဒိနိုင်ငံက ပြန်လာမယ့်သူတွေလည်း ရိဒ်မှာထားသင့်တာပေါ့၊ ဒါပေမဲ့ ဂိတ်ဝင်ပေါက်က တစ်နေရာထဲမဟုတ်တော့ ဖလမ်းမှာ အကုန်လုံးထားတာဖြစ်တယ်၊ ကိုယ့်ဒေသကို တိုက်ရိုက်ပြန်နိုင်ရင်တော့ ဖလမ်းမြို့အတွက်လည်း အကုန်ကျသက်သာမယ်၊ အဲထဲမှာ ကိုယ့်ဒေသကို တိုက်ရိုက်ပြန်ပြီး မတော်တဆ ရောဂါပိုးတွေ့ရင်တော့ အကုန်လုံးက အခက်အခဲနဲ့ ကြုံနေရမယ်” ဟု ပြောသည်။

စစ်ကိုင်းတိုင်းဒေသကြီးအတွင်း နယ်စပ်မြို့များရှိ Quarantine Center များတွင် စားသောက်ရေးနှင့် စေတနာ့ဝန်ထမ်းများ လုပ်အားပေးရန်လည်း အခက်အခဲရှိနေကြောင်း သူကဆက်ပြောသည်။

သူက “ကလေးခရိုင်နဲ့ တမူးခရိုင်ဖက်ကို ကျတော်အကုန်လုံး လိုက်စစ်ဆေးကြည့်တော့ Quarantine Center အားလုံးနီးပါး အခက်အခဲရှိကြတယ်၊ စားသောက်ရေးပဲဖြစ်ဖြစ်၊ စေတနာ့ဝန်ထမ်းတွေလည်း အချိန်ကုန် အားကုန် အမြဲတမ်းမလုပ်ဆောင်နိုင်ဘူး၊ အလှူရှင်တွေလည်း အမြဲတမ်းမရှိနိုင်ဘူး” ဟု ဆိုသည်။

မြန်မာနိုင်ငံသို့ ကလေးများ ကျောင်းတက်ရန်ကူညီ ပို့ဆောင်ပြီး ဖလမ်းမြို့တွင် Quarantine ဝင်နေသည့် Salai Tum Sang က “ကျွန်တော်တို့က စီးပွားရှာရင်း အိန္ဒိယနိုင်ငံကို ရောက်နေကြတယ်၊ ကလေးတွေကတော့ မြန်မာပြည်မှာ ကျောင်းထားကြတယ်၊ သူတို့ကျောင်းပိတ်ချိန်ကျတော့ မိဘတွေဆီကို အလည်ခေါ်ကြတာပေါ့၊ ခုက ကျောင်းလည်းဖွင့်တော့မှာမို့ ကလေးတွေကို ကျောင်းတက်စေဖို့ လာပို့ရင်း Quarantine ဝင်နေတာပါ၊ ကျွန်ုပ်ကလေးလိုပဲ ကိုယ့်နိုင်ငံကို ပြန်လာမယ့် ကျောင်းနေအရွယ် ၁၀၀ နီးပါးရှိသေးတယ်” ဟု ပြောသည်။

သူက ဆက်ပြီး “ဒီမှာနေရတာ အဆင်ပြေပေမဲ့ အသေးအမွား အသုံးအဆောင်ကအစ လိုအပ်တဲ့ဟာ ရဖို့က မလွယ်ဘူး၊ ကလေးတွေဆိုရင် သူတို့မစားနိုင်တဲ့ဟာတွေရှိတယ်၊ ကိုယ့်ဒေသဆိုရင်တော့ အိမ်ကနေမှာလို့လည်းရမယ်” ဟု ပြောသည်။